اسلام آباد۔ 17مارچ (اے پی پی) بنجائی وزیر واپار خرم دستگیر خان پارینے کہ پاکستان نیامی ایشیائی ملک آتون واپارئِ ودفنگ کن پبی گام گیج کننگ ئِ ، لاہور آن تاشقند و اشک آباد کن براہ راست جہاز آتا زوت بناءمریک۔ جمعہ نا دے ایوان بالا ٹی وقفہ سوج آتیٹی سینیٹر نزہت صادق و ایلو باسک آتا سوج آتا ورندی ٹی اوپارے کہ ساڑی ہی ٹی پاکستان نیامی ایشیائی ملک آتیٹی سرسہب روڈ شوز کرینے اوکان پد پاکستان نا کاروباری برادری ہم نیامی ایشیائی ملک آتون رابطہ غاتے ودفینو۔ اوپارے کہ وزارت واپار نیامی ایشیائی ملک آتون واپار ئِ ودفنگ کن چندی ڈٹ آتیا عمل کننگ ئِ و یوروایشین اکنامک یونین اٹی اوار مننگ کن ہم کوشست کننگ انگ ئِ۔ نومبر 2015ءٹی پاکستان و تاجکستان نا نیام اٹ اسیجائی بزنس کونسل نا قیام عمل اٹی اتنگا وخت اس کہ مئی 2015ءٹی ٹی ڈی اے پی و ترکمانستان نا چیمبر آف کامرس اینڈ انڈسٹری نا نیام اٹ مفاہمت نا اسہ یات داشت اسے آ ہم دستخط کننگا۔ وزارت واپار و ٹی ڈی اے پی نیامی ایشیائی ملک آتون واپار ئِ ودفنگ کن زرکار و کاروباری برادری نا پبی است بڈی ئِ کننگ ئِ۔
