اسلام آباد۔ 09 مارچ (اے پی پی) وزیراعظم عمران خان پارینے کہ ہراقومک اخلاقی قدر و انصاف ءِ گوہر او تباہ مریرہ، وڈی خور زموارآک تینا ناروا دولت نا زور آ غیر کانودی ذریعہ و منی لانڈرنگ اٹ پیسہ غاتا گدریفنگ ءِ توننگ کن نظر شاغوک آ ادارہ غاتے نزور کیرہ۔ بدبختی دادے کہ داوڑنا زموار آک راج اٹ وڈی خوری ءِ قابل قبول کیرہ ولدا ’’کنیک تو خلیک ہم‘‘ و ’’اسہ زرداری غٹ آ کبین‘‘ نا نعرہ ءِ خلنگک۔ وزیراعظم نا کماشی ٹی بنجائی کابینہ نا دیوان اڈ ہلک۔ دیوان نا بناء آ وزیراعظم عمران خان گپ وتران کرسا پارے کہ سینیٹ نا ساڑی آ گچین کاریک ہراوڑاٹ مسرغٹ انا مون آٹو، ای کابینہ نا مون آ سیکرٹری اقوام متحدہ نا جوڑ کروک پینل نا حوال’’فیکٹ آئی‘‘ ءِ تخنگ اٹی اُٹ، دا حوال پدتموک و نیزگار ملک آتیکن بھاز خوفناک ءِ۔ داحوال نا رداٹ ہر سال نیزگار ملک آتیان اسہ ہزار ارب ڈالر غیر کانودی منی لانڈرنگ نا کمک اٹ ہزگار ملک آتیا گدریفنگک ہرا ’’ٹیکس ہیون‘‘ ءِ۔ اسہ حوال اسےنا رداٹ نیزگار و پدتموک ملک آتیان وڈی خوری نا کمک اٹ 7 ہزار ارب ڈالر دُزی نا پیسہ دا ملک آتیٹی تموک ءِ۔ داغٹ اٹ حکمران اشرافیہ اوار ءِ۔ وزیراعظم پارے کہ نیزگار ملک آتا نواز شریف و زرداری دُزی نا پیسہ غاتے پیشن گدریفرہ تو داکان مست مچ آ ہمو ادارہ غاک ہرافک منی لانڈرنگ و غیر کانودی ذریعہ اٹ پیسہ غاتا گدریفنگ آ نظر تخرہ اوفتے نزور کیرہ۔ داہندن ءُ میگا پروجیکٹ اتیرہ ہرافتا الس ءِ گرج مفک ولے ان کک بیکس زیات مریک۔ دا وڈی خوری تا سوب آن ملک وامدار مریک۔ دانا قیمت ءِ کبینی نا ذریعہ الس ایتک۔ وزیراعظم پارے کہ وڈی خور زموار آک ناروا پیسہ اٹ میڈیا ہاؤس و ایلو ادارہ غاتے ہلسا و کاریم اٹ اتیرہ، دانا غٹ آن بھلا بدبختی دادے کہ راج اٹ وڈی خوری ءِ غٹ اکن قابل قبول جوڑ کننگک۔ ولدا کرپشن ءِ خراب تکپننگک۔ ولدا دا سوچ مون آ کاہک کہ کنیک تو کنفک ہم واسہ زرداری غٹ آ کبین، ہراہلیک او سیاسی بصیرت تصور کننگک۔ وزیراعظم پارے کہ قوم انا اخلاقیات چٹک تو داغٹ آن بھلا نسخان مریک، او قوم ولدا انصاف کننگ کپک ہراقوم اٹ اخلاقی قدر اف ہموڑے واکدار ءِ این آر او و نیزگار ءِ سزا تننگک۔ انصاف نا چٹنگ آن پد کیہی قومک تباہ مریرہ۔ اوپارے کہ حدیث نا مفہوم ءِ کہ بھلاقومک بھس مسر ہراڑے نیزگار و ہزگار کن انصاف نا آب جتا جتا مرے۔ اوپارے کہ ہراقوم اٹ اخلاقی آب مف تو او اسُل انصاف کننگ کپک، جرمنی و جاپان بھس مسوسر ولے ہڑتوم آک تینا نت تیا سلیسر۔ وزیراعظم پارے کہ غٹ ءِ سماءِ کہ سینیٹ نا گچین کاری تیٹی پاش آن پاش پیسہ چلینگک۔ اوپارے کہ سمندر آن ایپار پاکستانی تے وونٹ انا حق تننگ و گچین کاری تیٹی الیکٹرانک ووٹنگ مشین نا کاریم اٹ اتنگ آ پیش رفت نا ہردیوان اٹ جاچ ءِ ہلیوہ۔ ہراوڑاٹ ساڑی آ سینیٹ گیچن کاری مس اونا نن پین متحمل مننگ کپنہ۔ ننے اسہ شفاف ءُ نظام اس اتوئی ءِ۔ داکان مست کابینہ نا دیوان نا بنا تلاوت کلام پاک آن مس۔ بنجائی وزیر پیر نورالحق قادری تلاوت کرے۔
