اسلام آباد۔ 09 مارچ (اے پی پی) اسپیکر قومی اسمبلی اسد قیصر پارینے کہ پریس گیلری پارلیمنٹ نا اہم ءُ بشخ اسے۔ اوپارے کہ ملک انا گچین دروشم ءِ تالان کننگ و گورننس ءِ گچین کننگ اٹ میڈیا نا مثبت کڑد بھاز اہم ءِ۔ اوپارے کہ صحافی برادری ءِ کسبی زمواری تا سرتننگ اٹ مون تروک ویل آتے ایسر کننگ پارلیمنٹ نا زمواری ءِ۔ داخیال آتا درشانی ءِ او سے شنبے نادے آ چیئرمین سینیٹ صادق سنجرانی تون اوار پارلیمنٹ ہاؤس نا دنگ اٹ میڈیا سینٹر نا بناءِ کننگ نا وخت آ صحافی تتون گپ وتران کرسا کرے۔ اسپیکر قومی اسمبلی اسد قیصر پارلیمانی صحافی تے مبارکباد ترسا باور کرفے کہ پارلیمانی صحافی تا ایلو سلاہ بشمول پریس گیلری ءِ ودفنگ، پوسکن آ ٹیکنالوجی نا فراوانی ءِ پین گچین کننگک تانکہ صحافی برادری تینا کسبی سرجزآتے جوان اٹ سرتننگ کیر۔ اوپارے کہ قومی اسمبلی سیکرٹریٹ پرمان جاری کننگانے کہ او پریس گیلری ٹی پارلیمانی صحافی تا کسبی زمواری تے گچین وڑاٹ سرتننگ کن آسراتی مہیا کے۔ صحافی نا اسہ سوج اسے نا ورندی ٹی اسپیکر قومی اسمبلی اسد قیصر پارے کہ اپوزیشن وزیراعظم نا ایوان آن پت انا وونٹ دوئی کننگ آ الس اٹ منفی پروپیگنڈا کننگ نا کوشست کننگ ءِ۔ اوپارے کہ وزیراعظم نا پت انا وونٹ اٹ پریس گیلری ٹی مچ آ ملک انا میڈیا نا ساڑی گری ٹی پت انا وونٹ انا غلط حساب وکتاب ءِ پیش کننگ نا ہیت ءِ کننگ آئین و کانود آ ملنڈ خلنگ آنبار ءِ۔ اوپارے کہ جمہوریت نا سوگوی و سیاست اٹ بے سگی و خرینی ءِ کم کننگ کن تینا کڑد ءِ ادا کرسا کیوہ۔ اوپارے کہ اپوزیشن تون پیش بروک آ معاملہ نا مذمت ءِ کرینٹ و دا چرجوئی ٹی اسہ کمیٹی اس ٹہیفنگ انگ ءِ ہرا پارلیمنٹ نا تہہ و پیشن سیاسی جماعت آتا راہشون آتون پیش بروک آ باندات آتا جاچ ءِ ہلیک۔ داوخت آ چیئرمین سینیٹ محمد صادق سنجرانی گپ وتران کرسا پارے کہ جمہوری نظام اٹ میڈیا نا کڑد بھاز اہم ءِ آجوئی سلاہ درشانی کن ہروڑنا گام گیج کننگ انگ ءِ۔ آجومیڈیا نا سوب آن الس ءِ حقیقت آ مبنی معلومدار ملک۔ ہنداسوب ءِ کہ میڈیا ءِ ریاست نا چارمیکو تمبہ پاننگک۔
