اسلام آباد۔ 09 مارچ (اے پی پی) اقوام متحدہ تینا اسہ حوال اسے ٹی انکشاف کرینے کہ پاکستان 2025ء اسکان پاکستان نا آبادی 24 کروڑ 20 لکھ اسکان سرمریک وخت اس کہ ساڑی آ آبادی 21 کروڑ 20 لکھ ءِ ہرانا رداٹ پاکستان آبادی نا لحاظ اٹ دنیا نا پنچ میکو غٹ آن بھلا ملک مریک۔ اقوام متحدہ نا رپورٹ اٹ گمان ظاہر کننگانے کہ 2030ء اسکان پاکستان نا شاری آبادی 25 کروڑ اسکان سرمریک۔ حوال اٹ پاننگاپاکستان نا شاری علاقہ غاتا جم آبادی 3 کروڑ 20 لکھ ئس وخت اس کہ داوخت آ پاکستان نا جم آبادی نا 36.9 درسد شاری آبادی آ تالان ءِ ہراٹی 2050اسکان 50 درسد اسکان ودکی نا گمان ءِ و شاری آبادی ٹی سالانہ 3 درسد نا کچ آن ودکی مننگ ءِ۔ حوال نا رداٹ غٹ آن بھلا شار لاہور نا آبادی 50 لکھ آن ودسا اسہ کروڑ 10 لکھ وخت اس کہ کوئٹہ و اسلام آباد کون آ غٹ آن چنکا شار تا آبادی ودسا اِراہنداخہ مسنے وخت اس کہ باقاعدہ ڈٹ بندی مفننگ نا سوب آن خلقی آبادی ٹی ہم 2030ء اسکان پین ودکی نا گمان ءِ، رپورٹ اٹ پاننگاکہ کچہ انگا آبادی تا ہنکینی حالیت آتے گچین کننگ و سوگو شونداری ہدف آتے پورو کننگ کن کچہ انگا آبادی ٹی رہینگوک آتا جان جوڑی و راجی و اقتصادی حالیت آتیٹی گچینی نا گرج ءِ۔
