صوبائی وزیر خزانہ میر ظہور احمد بلیدی نا ’’اے پی پی‘‘ تون گپ وتران

کوئٹہ۔ 09 مارچ (اے پی پی) صوبائی وزیر خزانہ میر ظہور احمد بلیدی پارینے کہ زالبول آتا ملکی شونداری و قومی زرگزران نا گچینی ٹی نمان کڑد اسے، صوبائی حکومت زالبول آتے واکدار کننگ صنفی امتیاز نا چٹفنگ اٹ اوفتا بریبر حق ءِ پک کننگ کن کوشست کننگ ءِ۔ داہیت ءِ او سے شنبے نادے سول سیکرٹریٹ کوئٹہ ٹی خاص وڑاٹ زالبول آتا جہانی دے انا وخت آ ’’اے پی پی‘‘ تون گپ و تران کرسا پارے۔ صوبائی وزیر پارے کہ صوبائی حکومت زالبول آتا چندی بشخ آتیٹی بشخ ہلنگ کن کانود جوڑ کننگ نا عمل ءِ ترند کرینے دا چرجوئی ٹی تدوک آ سال اسہ جامع ڈٹ انا منظوری ءِ تننگانے، صنفی نا بریبری ءِ چٹفنگ کن حکومتی کہول آ روزگار و اسکالر شپ اٹ زالبول آتا جتا کوٹہ اس جتا کننگانے۔ اوپارے کہ جہانی کہول آ مون آ ہِننگ و زرگزرانی شونہالی ٹی زالبول آتا اہم کڑد آن نمن مننگ مفک و دارداٹ حکومت صنفی بریبری زالبول آتا چندی بشخ آتیٹی شرکت و اوفتا حق انا بابت کانود آ عملدرآمد کن پبی گام گیج کننگ ءِ۔ میر ظہور احمد بلیدی پارے کہ اینو نا نیاڑی خوانوک کسبکار و ہر بشخ اٹ تینے منفنگ کن غیر یقینی جوزہ نا درشانیءِ کننگ ءِ، نرینہ نانسبت نیاڑی زیات حساس مریک و ہرکاریم ءِ زمواری اٹ پورو کیک زالبول ءِ راج اٹ باوقار زند اس تیر کننگ کن حکومتی کہول آ وارخواہی فراوان کننگ انگ ءِ۔