اسلام آباد۔8مارچ (اے پی پی): بلوچستان حکومت ءِ جارچین لیاقت شہوانی مراگش ءِ گڈی روچ یک شمبے ءَ شالیمار گراؤنڈ ءُ ایف 9 پارک اسلام آباد ءَ سے روچگیں فیسیٹول ‘اسلام آباد ٹورازم فیسٹیول’ ءَ سربوتگ۔ بلوچستان عوامی پارٹی ءِ باسک بانک مینا مجید ءَ آئی ءَ را بلوچستان پویلین ءَ وش اَتک کتگءُ اے بابت ءَ آئی ءَ را بریف کتگ۔ لیاقت شہوانی ءَ بلوچستان پویلین ءَ جوڑ کتگیں اسٹالانی چارءُ تپاسی کتگ ءُبانک مینا مجید ءِ چست کتگیں گامگیج ساڑاتگ اَنت۔ آئی ءَ گوں ( اے پی پی) ءَ گپ کنان ءَ گشتگ کہ اسلام آباد ایف 9 پارک ءَ منی بلوچستان سمبائنگ بوتگ ءُ اے بابتءَ آئی ءَ بلوچستان ٹورزم ڈیپارمنٹ ءِ ڈائریکٹر محمد قیصر خان، اسسٹنٹ ڈائریکٹر محمد منیر بلوچ ءُ بانک مینا مجید ءِ کوشستاناں ساڑاتگ۔ آئی ءَ گشتگ کہ من ءَ ادءَآیگ ءَ سک باز وشی بوتگ ۔ آئی ءَ گشتگ کہ بلوچی گدان ، بلوچی سازءُ زیملءُ بلوچی پُچ ءُ پوشاک ءِ گندگءَ منءَ انچو سما بوت کہ من انو بلوچستان ءَ ترءُ گرد کنگ ءَ اَں۔ آئی ءَ گشتگ کہ اے بلوچستان ءِ سروزیر جام کمال خان ءِ وژن اِنت کہ آ ٹورازم ءَ را دیمروئی دیئگ لوٹ ایت، آ کلچر ءَ را دیما برگ لوٹ ایت۔ آئی ءَ گشتگ کہ مرچی بلوچستان ءِ تہا درائیں ادارگ گوں دلجمی ءُ دلبڈی ءِ گوما کار کنگ ءَ اَنت چیا کہ آ سرپد اَنت کہ آیانی سرپانکی ءُ سروکی کنوکیں یک راہشونے اَست اِنت ، آ بلوچستان ءِ سروزیر جام کمال خان ءِ سروکی ءَ باز وش اَنت ۔ آئی ء َ گشتگ کہ ٹورازم ءِ ہوالگ ءَ درائیں سیکٹرآں دیمروئی دیئگ ءَ اَنت، پہ ٹورازم ءِ ہوالگءَ بلوچستان ءَ بازیں موہ اَست اِنت۔ بلوچستان ءِ زیبائی ءَ را سرجمیں پاکستان ءَ را پیش دارگی اِنت۔ بلوچستان ءِ ریکسار ، کوہ ، زِرءُ زیارت ءُ ایندگہ دمگ پہ وتی جلوا ہ ناکی ءَ نام دار اَنت۔ آئی ءَ گشتگ کہ گوستءَ کس ءَ اے بابتءَ دلگوشی ناکتگ بلے مئے حکومت ءَ اے بابتءَ گامگیج چست کتگءُ بلوچستان ءِ زیبائی ءَ را درستاناں پیش داشتگ۔ آئی ءَ گشتگ کہ ٹورازم ءَ را دیمروئی دیئگ ءِ ھاترءَ ماسٹر پلاننگ جوڑ کنگ ءَ اَنت۔ یک رندے پدا آئی ءَ بلوچستان ٹورازم ڈیپارٹمنٹ ءِ ڈائریکٹر محمد قیصر خان، اسسٹنٹ ڈائریکٹر محمد منیر بلوچ ءُ بانک مینا مجید ءِ کوشستاناں ساڑاتگ۔
