اسلام آباد۔8مارچ (اے پی پی): شالیمار گراؤنڈ ءُ ایف 9 پارک اسلام آباد ءَ سے روچگیں فیسیٹول ‘اسلام آباد ٹورازم فیسٹیول’ ءَ بلوچستان پویلین ءَ بلوچستان ءِ نمائندگی کنان ءَ بلوچستان عوامی پارٹی ءِ باسک بانک مینا بلوچ ءَ درستیں مہماناں وتی پویلین ءِ تہا وش اَتک کتگ۔ اے سے روچگیں مراگش کہ سے روچاں پد آسر بوتگ۔ اے درگت ءَ گوں اے پی پی ءَ گپ کنانءَ بانک مینا مجید ءَ گشتگ کہ بلوچ ہرجگہ بباں بلے وتی نمائندگی ءَ را وت بہ کن اَنت، وتی دود ءُ ربیدگ ءَ را وت زندگ بہ داراں ، وتی دود ءُ ربیدگ ءَ را دنیا ءَ پیش بہ داراں ۔ مئے دود ءُ ربیدگ مئے پجار اِنت ءُ ایشیءِ سرءَ مارا پھر اِنت۔ آئی ءَ گشتگ کہ ڈائریکٹریٹ آف ٹورزم ءِلکھ منت کہ آئی ءَ را مارا وتی اِد ءَ توار کتگءُ موہ داتگ کہ ما اے سے روچگیں مراگشءَ وتی دود ءُ ربیدگاں پیش بداراں۔ آئی ءَگشتگ کہ مئے اِدءَ آیگ ءِ یکیں مولءُ مراد اِنت کہ ما نیشنل لیول ءَ وتی کلچر ، وتی زبان ءَ را دیمروئی بدے اَں۔ آئی ءَ گشتگ کہ ما اِدءِ مھلوک ءَ را سرپد کنگ لوٹاں کہ بلوچستان ءَ چے چے اَست، آئی ءِ زیبانی چے چے اَنت، بلوچانی پکر ءُ حیال چے اَنت، مئے ددو ءُ ربیدگ چے اَنت، بلوچ چاگرد ءِ تہا بلوچ جنین آدم ءُ زالبولانی کرد چے اَنت۔ آئی ءَگشتگ کہ مئے اِدءِ آیگ بلوچستان ءِ نیمگءَ امنءُایمنی ءِ کلوہ دیئگ اِنت۔
