اسلام آباد۔ 08 مارچ (اے پی پی) چیئرمین سینیٹ محمد صادق سنجرانی پارینے کہ ہرملک و قوم انا شونداری ٹی زالبول آتا کڑد المی ءِ، زالبول آک زند انا ہربشخ اٹی تینے منفینو و ہرپڑاٹ زالبول آک نرینہ غاتون ہم کوپہ کڑد ادا کننگ ءُ۔ داہیت ءِ او زالبول آتا جہانی دے انا وخت آ تینا کلہو اٹی پارے۔ چیئرمین سینیٹ پارے کہ پاکستانی زالبول آتا ملکی شونداری ٹی خذمت آتے خراج تحسین پیش کیوہ، پاکستانی زالبول آک پک کرینو کہ اسہ بشخ اسے ٹی ہم نرینہ غاتیان کم افس، پوسکن آ دور انا رداٹ نن ہندن ءُ ماحول اس جوڑ کین ہراڑآن زالبول آتا مون آ ہِننگ اٹ کمک رسینگے۔ اوپارے کہ ننا مذہب اسلام اٹ زالبول آتے غٹ آن زیات شرف تس، نیاڑی لمہ ہم ارے، ایڑھ ومسڑ ہم، زند انا ہردروشم اٹ نیاڑی اسہ مقدس ءُ ہند و اہم ءُ کڑد اس ادا کرسا نظر بریک۔ اوپارے کہ اینو نن گمر کین کہ ہرپڑاٹ چائے او گوازی مرے، سیاست مرے یا تعلیمی میدان مرے زالبول نرینہ غاتا کم کوپہ بلکن نرینہ غاتیان اسہ گام اس مون آ خننگرہ۔ محمد صادق سنجرانی پارے کہ پاکستان اٹ زالبول آتے زند انا ہربشخ اٹ مون آ ہِننگ کن وارخواہی فراوان کننگ نا رداٹ گچین گام گیج کننگانے ولے دا چرجوئی ٹی پین کوشست کننگ نا گرج ءِ تانکہ زالبول آتے بڑزکو تعلیم دوئی کننگ تون اوار اوار روزگار نا بریبر وارخواہی دوبننگ کے و زالبول آک آجوئی اٹ تینا فیصلہ ءِ کننگ کیر۔ پاکستان نا غٹ سیاسی جماعت آک ملکی شونداری ٹی زالبول آتا کڑد و نمائندگی ءِ مون آ دننگ کن گام گیج کرینو۔ پاکستان نا پارلیمنٹ زالبول آتا شونداری کن گچین کانود سازی ہم کرینے و سینیٹ آف پاکستان ءِ دا شرف دوئی ءِ کہ داڑے اہم کانود سازی زالبول آتا کنڈآن درستی راستی کرفنگانے۔ چیئرمین سینیٹ پارے کہ داوخت آ ای قائد اعظم محمد علی جناح نا ہمو روشنا لوز آتے تینا و دا ایوان کن کسر نا ڈیوا تکیوہ ہراٹی اوپارے کہ’’ اسہ قوم اس ہم زالبول آتے اوار دننگ آن بیدس شونداری نا کنڈآ ہِننگ کپک۔ دنیا ٹی اِرا طاقت ءُ اسٹ تلوار و ایلو قلم ہڑتوم آتا نیام اٹ مسابقت و اختلاف مریک و اسہ مسٹ میکو قوت ءِ ہرا داہڑتوم آتیان سوگو ءِ او زالبول ءِ‘‘۔
