اسلام آباد۔ 08 مارچ (اے پی پی) وزیر خارجہ مخدوم شاہ محمود قریشی پارینے کہ پاکستان نا آئین بریبر حق انا ضمانت ایتک۔ کانود جوڑ کننگ، پالیسی، ادارہ جاتی و انتظامی گچین گام گیج آتا کمک اٹ زالبول آتے سیاسی، زرگزرانی و راجی وڑاٹ واکدار کننگ اٹ نن نمان پیش رفت کرینن۔ زند انا ہربشخ و ہر کہول آ زالبول آتا حق انا اوارمننگ ءِ پک کننگ ءِ ننا حکومت اولیت ایتک۔ دوشنبے نادے آ زالبول آتا جہانی دے انا وخت آ کلہو اٹی وزیر خارجہ پارے کہ جہانی برادری تون اواری اٹ اینو نن زالبول آتا جہانی دے ءِ اڈتننگ اُن۔ دازالبول آتے واکدار کرسا شونداری کن خوشی کننگ و ننا اجتماعی عزم انا تجدید نا وخت ءِ کہ نن زالبول آتا حق انا مون آ دننگ و شرف کن کوشست آتے پین ترند کین۔ وزیر خارجہ پارے کہ کورونا دین انا مشکل دور اٹ پاکستان اٹ زالبول آک بے مٹ جیرت و سرکڑدہ ئی لائخی تا درشانیءِ کریر و کورونا دین انا برخلاف قوم انا اجتماعی ردعمل و بحالی نا کوشست آتیٹی گچین کڑد ادا کرینو۔ جان جوڑی نا عملہ، بنداوی کہول آ خیالداری، ایجادات، انسانی حق انا دفاع و راج انا تنظیم سازی نا پلو آتیان ننا زالبول آک ہراول دستہ نا کڑد ءِ ادا کرینو۔ وزیراعظم عمران خان نا راہشونی ٹی تاریخ ساز احساس ایمرجنسی کیش پروگرام اسہ زالبول اسے نا کماشی ٹی بناکننگا تانکہ کورونا دین اٹی راج اٹ ودی مروک آ منفی زرگزرانی و راجی اثرآتا سرسہبی اٹ مقابلہ ءِ کننگ مرے۔ اوپارے کہ انسانی حق انا جہانی ڈیکلریشن تیار کرسا پاکستان نا مندوب بیگم شائستہ اکرام اللہ رشتہ ازدواج کنبہ مننگ نا نرینہ و نیاڑی تا اسہ وڑ حق انا بابت آرٹیکل 16 ءِ اوار کرفنگ اٹ فعال کڑد ادا کریسس۔ ننے مون تروک راجی و زرگزرانی مشکل آتیان پد ہم پاکستان اٹ سرکڑدہ غاتا کلیدی مناصب آ زالبول آتا کچ اٹ پدریسہ ودکی مسنے، ننا ملک اٹ اسہ زالبول اس وزیراعظم رہینگا، کم وئی نوبل پرائز ءِ کٹوک آ زالبول نا تعلق پاکستان آن ءِ۔ گورنر اسٹیٹ بینک و قومی اسمبلی نا اسپیکر آن بیدس اسہ بھلوکچ اسے ٹی زالبول وزیر آتیان بیدس سفارت کار، جج و بڑزکو کہول انا سول سرونٹ و ڈپلومیٹس ءُ۔ ننا زالبول آک جنگی جہاز ہم بال ایترہ، اقوام متحدہ نا امن دستہ غاتیٹی خذمت سرایترہ وخت اس کہ اسہ زالبول اس آرمی ٹی تھری اسٹار جنرل نا عہدہ غاہم فائز ءِ۔ بحیثیت قوم نن اوفتے و راج و ریاست پاکستان کن اوفتا کوشست آتا کڑد ءِ سلام پیش کینہ۔ وزیر خارجہ پارے کہ دادے ءِ اڈترسا نن غیر کانودی وڑاٹ بھارت نا کوزہ ٹی جموں وکشمیر نا زالبول آتا حالیت ءِ است آن دننگ کپنہ۔ تدوک آ ہفت آن زیات دہائی ٹی کوزہ گیر بھارتی فوج دا زالبول آتا برخلاف انسانی حق انا سنگین پامالی و ڈوہ تا ارتکاب کرینے، بدترین جبر و استبداد نا چم آتا شست کرے، جنسی ڈوہ، بیدادی و بے حرمتی و بدسلوکی نا بھاز ناروا حالیت آتیان اوفتے گدرینگوئی تمانے۔ انسانی حق انا دا خلاف ورزی تا اقوام متحدہ نا ہائی کمشنر انسانی حق انا 2018و 2019ء نا کشمیرآ بروک آ اِرا رپورٹس، چندی کمیونیکیشن و اقوام متحدہ نا خصوصی پروسیجر مینڈیٹ ہولڈرآتا بیان تیٹی سرجمی اٹ ذکر ارے۔
