اسلام آباد۔ 08 مارچ (اے پی پی) وزیر داخلہ شیخ رشید احمد پارینے کہ عظیم سلہہ بند فوج و پولیس نا کارندہ غاک تینا جان تے ندر کرسا دہشت گردی ءِ شکست تسنو، اسلام آباد، راولپنڈی، لاہور، پشاور و کراچی ٹی خطرہ ءِ، پارلیمنٹ نا مون آ اِرادے مست انتس کہ مس اونا مذمت ءِ کیوہ، سرکڑدہ غاک ہم نیوز کانفرنس کن جوان ءُ جاگہ اس ہروسر۔ بجٹ اٹ سرکاری ملازم آتا تنخواہ تیٹی ودکی کننگک۔ داخیال آتا درشانی ءِ او دوشنبے نادے آ پاکستان انسٹیٹیوٹ آف میڈیکل سائنسز(پمز) اٹی میڈیا تون گپ وتران کرسا کرے۔ اوپارے کہ ننا سلہہ بند فوج و پولیس شہید مرسا دہشت گردی ءِ شکست تسنو۔ اوپارے کہ قطبی و سویلی وزیرستان اٹ پاک فوج 5 دہشت گرد آتے دروہم خلکوسس۔ انشاء اللہ دہشت گرد آک شکست کنیرہ و ملک اٹ امن و سکون نا فضا اس قائم مریک۔ اوپارے کہ تدوک آ دے راولپنڈی اسلام آباد اٹی اِراپولیس کارندہ شہید مسر ہراڑاودے افسوز ءِ۔ پولیس و فوج جان تا پرواہ ءِ کپرسا ننا زند ءِ آسان کیرہ۔ اوپارے کہ نیکٹا و ایلو ادارہ غاک حوال تسنو کہ ہلال و عدنان رشید نا کمانڈر راولپنڈی و اسلام آباد اٹی ایکٹیو ءُ۔ اوپارے کہ شہداء پیکج نا رداٹ شہید آتے خاہوت ءِ پونے مسہ کروڑ روپئی نا پیکج تننگک۔ مچ آ زند تنخواہ تا زر تننگک۔ اوپارے کہ وطن عزیز کن پولیس فوج دہشت گردی نا برخلاف جنگ کریر و بھلو قربانی اس تسر۔ اسہ سوج اسے نا ورندی ٹی اوپارے کہ ناکہ غاتیا غریب آتے تنک کننگک۔ ایگل اسکواڈ چلیفنگک، پوسکن ءُ گاڈی پولیس ءِ تننگک۔ ایلو ناکہ غاتے ہم چٹفنہ۔ اسہ سوج اسے نا ورندی ٹی اوپارے کہ پارلیمنٹ نا مون آ اِرادے مست انتس کہ مس اونا مذمت ءِ کیوہ ولے سرکڑدہ غاک ہم نیوزکانفرنس کن جوانءُ جاگہ اس ہروسر۔ ہندن کہ واقعہ نا حوال ملا آئی جی اسلام آباد ءِ فون کرسا سیکورٹی تننگ نا پارت کریٹ۔
