اسلام آباد۔ 08 مارچ (اے پی پی) پاکستان تحریک انصاف نا راہشون عثمان ڈار پارینے کہ ملکی سیاسی زرگزرانی و راجی شونداری ٹی زالبول آتا پیش گامی ستاکڑزک، وزیراعظم نا ویژن نا رداٹ زالبول آتے واکدار کننگ کن حکومتی سرپرستی فراوان کننگ انگ ءِ۔ داخیال آتا درشانی ءِ او دوشنبے نادے آ زالبول آتا جہانی دے انا وخت آ تینا کلہو اٹی کرے۔ اوپارے کہ ملکی سیاسی زرگزرانی و راجی شونداری ٹی زالبول آتا پیش گامی ستاکڑزک۔ سازگار چاگڑد اٹ زالبول آتے مستین نا مقابلہ ٹی مون آ ہِننگ نا جوان ءُ وارخواہی رسینگے۔ عثمان ڈار پارے کہ مون تروک چیلنج آتیان پد ہم زالبول آتا مون آ ہِننگ نا لگن است بڈ ءِ۔ وزیراعظم نا ویژن نا رداٹ زالبول آتے واکدار کننگ کن حکومتی سرپرستی فراوان کننگ انگ ءِ۔ اوپارے کہ ملکی فیصلہ سازی ٹی اوار مننگ کن ورنا زالبول آتے یوتھ کونسل نا بشخ جوڑ کننگا۔ سرسہب ورنا پروگرام نا رداٹ زالبول آتے روزگار و کاروبار نا فراوانی کن وارخواہی تننگا۔ یوتھ انٹرپینیور شپ اسکیم نا رداٹ داتم اسکان زالبول آتیٹی 2 ارب روپئی نا خڑک زر بشخنگانے۔ اوپارے کہ 12000آن زیات زالبول آتے کسب نا فراوانی کن فنی تربیت تننگا۔ زالبول آک ملکی گچینی نا بابت حکومتی فیصلہ غاتیا پبی پت انا درشانی ءِ کریر۔ 35 ہزار زالبول ٹائیگر فورس اٹ رجسٹرڈ مسر ہرافتیان 9 ہزار عملی وڑاٹ میدان اٹ دڑنگار۔ حکومت آخبت اٹ ہم زالبول آتے ملکی شونداری و فیصلہ سازی نا عمل اٹ شریک تخک۔
