جسمانی معذور زالبول آتے راج انافعال ءُ بشخ اس جوڑ کننگ کن دنیا تون اواری اٹ کاریم کننگ اٹی اُن، اسد قیصر

اسلام آباد۔ 08 مارچ (اے پی پی) اسپیکر قومی اسمبلی اسد قیصر جہانی زالبول آتا دے انا وخت آ مچ آ قوم ءِ مبارکباد ترسا پارینے کہ خصوصی بندغ خاص وڑاٹ جسمانی معذوری ناگواچی زالبول آتے راج انا فعال ءُ بشخ اس جوڑ کننگ کن دنیا تون اواری اٹ کاریم کننگ اُن۔ پارلیمنٹ کانود جوڑ کننگ تون اوار خصوصی بندغ آتا کسر اٹ بروک آ اڑاند آتے مُر کننگ کن تینا پبی کڑد ءِ ادا کننگ ءِ۔ ای باوری کرفیوہ کہ پارلیمنٹ دا بابت تینا غٹ زمواری تے پورو کیک۔ او یک شنبے نادے آ پارلیمنٹ ہاؤس نا سوزہ زار اٹ جہانی یوم زالبول نا وخت آ جسمانی وڑاٹ معذور زالبول آتا شرف اٹ اڈ ہلوک آ دود آن تران کریکہ۔ داوخت آ اسپیکر پارے کہ جہانی یوم زالبول نادے ہندن ءُ موقع اسے کہ دانا کمک اٹ نن راج انا خصوصی بندغ آتا مشکل آتے مُر کننگ و اوفتے راج انا فعال ءُ بشخ اس جوڑ کننگ کن ملکی و جہانی کہول آ شعور تالان کننگ کینہ۔ اوپارے کہ نن دا سفر اٹ دنیا تون اواری اٹ کاریم کننگ اُن۔ اوپارلیمنٹ اٹ پارلیمنٹ نا زالبول باسک آتا پڑک وومن کاکس اناچیئرمین منزہ حسین نا ستاءِ کرے و پارے کہ داچرجوئی ٹی اوکانود جوڑ کننگ نا بابت ہراکڑد ءِ ادا کرینے او ستاکڑزک۔ پارلیمنٹ نا کہول آ او داتم اسکان کروک آ گام گیج آتا بارواٹ ہیت کرسا پارے کہ نن خصوصی بندغ آتیکن آئی سی ٹی اس ہم منظور کرینن و خصوصی بندغ آتیکن پارلیمنٹ نا خصوسی کمیٹی اس ہم جوڑ کرینن، ہرانا مسخت کانود جوڑ کننگ اٹ سقم مُر کننگ و ہندن ءُ سلاہ و سوج شین تننگ ءِ ہرافتا کمک اٹ ساڑی کانود آ عملدرآمد ءِ پک کننگ مرے۔ اوپارے کہ پارلیمنٹ ہاؤس اٹ ہم خصوصی بندغ آتا رسینگ کن کاریم مننگ ءِ، نن آئین ءِ بریل آ اتنگ کن ہم کاریم کننگ اُن۔ اسپیکر اسد قیصر پارے کہ ہسپتال و اہم تعلیمی ادارہ غاتسکان ہم خصوصی بندغ آتا رسینگ ءِ پک کننگ کن کاریم مننگ ءِ۔ پارلیمنٹ نا خصوصی کمیٹی تعلیم و جان جوڑی نا بشخ آتیٹی خصوصی بندغ آتیکن ساڑی کانود آ عملدرآمد کن کن ہم کاریم کننگ ءِ۔ خصوصی بندغ آتیکن موبائل ایپ انا ہم بناءِ کننگانے ہرانا کمک اٹ شناختی کارڈ، پاسپورٹ نا دوئی کننگ و ڈریونگ لیسن تون اوار ایلو سروس اسکان اوفتا رسینگ آسان مریک۔ اوپارے کہ ای تینٹ دا تکلیف آن گدرینگ انگ اُٹ انتئے کہ کنا دا بشخ اتون خصوصی است خواہی ءِ۔ اوپارلیمنٹ اٹ زالبول باسک آتا کڑد انا ستاءِ کرے و پارے کہ پارلیمنٹ دا بابت تینا غٹ زمواری تے پورو کیک۔