اسلام آباد۔ 08 مارچ (اے پی پی) حریت راہشون یاسین ملک نا اُرائی مشعال حسین ملک پارینے کہ بھارت نا غیر کانودی کوزہ ٹی جموں و کشمیر اٹی کوزہ گیر فوج زالبول آتا عصمت دری ءِ جنگی سلہہ نا وڑاٹ کاریم اٹ اتنگ ءِ، دنیا کشمیر نا زالبول آتا حالیت آ ہم چکار کے۔ دوشنبے نادے آ زالبول آتا جہانی دے انا وخت آ مقبوضہ کشمیر نا زالبول آتا حق انا بابت مشعال ملک تینا کلہو اٹی پارے کہ مچ آ دنیا ٹی زالبول آتا جہانی دے ءِ اڈتننگ انگ ءِ، زالبول آک چندی بشخ آتیٹی تینا ہند ءِ دوئی کریر۔ مشعال ملک پارے کہ ہر سوسائٹی ٹی زوالبول آک شون ہلکر و تینے منفیر، دنیا مقبوضہ کشمیر نا زالبول آتا حالیت ءِ ہم ہُرے۔ مقبوضہ کشمیر اٹ زالبول مننگ غٹ آن بھلا جہاد ءِ، ہموڑے ورنامارتا لمہ غاک شہید آتا لمہ پاننگرہ۔ مشعال ملک پارے کہ بھارت نا غیر کانودی کوزہ ٹی جموں و کشمیر اٹی زالبول آتے تینا مار، اَرے، ایلم و ایلو عزیز و قریب آتا بھارتی فوجی تا دوتے اٹ خلنگ آ خڑینک شولنگ نا حق تننگانے۔ مشعال ملک پارے کہ مقبوضہ کشمیر نا زالبول آتے سداسہاگن مننگ نا ہچ ءُ حق اس اف۔ مشعال ملک مچ آ دنیا نا زالبول آتیان سوج کرے کہ انت مقبوضہ کشمیر نا زالبول آک،زالبول افس، زالبول آتا حق تو درکنار، کشمیری تے انسان مننگ نا حق تفننگ انگ ءِ۔
