نبشتہ کار: رخشندہ تاج بلوچ
اسلام آباد۔7مارچ (اے پی پی): ملک ءَ ادارگ آنی گہتری ءُ جتا جتائیں سرکاری ادارگ ءُ محکمہ آنی کار رپک ءِ تہ ءَ گیشی ءُ ھرچ ءُ درچ آنی تہ ءَ کمی ءِ وسیلگ ءَ ایشانی کار ءِ تہ ءَ گیش گہتر کنگ آیوکیں حکومت آنی سر ءَ یک ٹوھیں زمہ واری ات۔
گوستگیں حکومت آنی نیمگ ءَ سرکاری محکمہ ءُ حکومتی ملکیت ادارگ آنی کار رپک ءِ تہ ءَ گیش گہتری آرگ ءِ تران کنگ بوتگ بلے گوزوکیں وھد ءِ گوما پاکستان ریلویز، راجی بالی کمپنی پی آئی اے ءُ پاکستان سٹیل ملز وڑیں ٹوھیں سرکاری ادارگ آنی گوما ایندگر کسانیں ادارگ آنی ڈسپلین یک شل ءَ گیش ھرابی ءِ نیمگ ءَ جنزگ ءَ گندگ بوتگ۔
مزن وزیر عمران خان ءِ سروکی ءَ استیں حکومت ءَ سرکاری ادارگ آنی گہتری ءِ چیر دستی ءَ مالی رد ءَ وت مستر جوڑ کنگ ءُ کار کرد ءِ تہ ءَ گہتری ءِ بار وتی کوپگ آں کتگ۔ اے رد ءَ نامداریں گہتری کار آنی بلدکار ڈاکٹر عشرت حسین ءِ اے کار ءِ واستہ مزن وزیر ءِ مشیر پوسٹ کنگ بوت۔
گہتری ءِ ضلورت، ارزشت ءُ کار کنگ ءِ جاور ھال آنی سر ءَ چمشانک دیان ءَ ڈاکٹر عشرت حسین ءَ گوشت سکہ یک گرانیں کار ات ایش بھر آنی تہ ءَ سرجم کنگ بوھگ ءَ انت۔ آئی ءَ امیت سہرا کت کہ راجی نوک سر جوڑیشت ءَ سرکاری ادارگ آںی وت مہ وت کمک آنی رد ءَ اے رد ءَ جوانیں دیمروئی کنان ءَ پکار کتگیں آسر در جنگ بنت۔ “اے پی پی” ءَ گوں ھاسیں تران کنان ءَ آئی ءَ گوشت کہ گہتری کار چار بھر آنی تہ ءَ بھر کنگ بوتگ انت۔
اولی بھر ءَ بنجاھی ادارگ انت۔ ایشی اندر ءَ یک رنگیں کار کنوکیں ادارگ آناں وت مہ وت ھوار کنگ ءَ ایشانی کساس ءِ تہ ءَ کمی کنگ بوتگ۔ ڈاکٹر عشرت حسین ءَ گوشت کہ درستیں ادارگ آنی کساس 441 ءَ چہ ود اتگ انت، ما ایشاناں کم کنان ءَ ، بند کنگ یا پرائیویٹائزیشن ءِ وسیلگ ءَ کم کنان ءَ 342 ءَ تاں سر بوتگ آں۔
دومی بھر ءَ ڈاسکٹر عشرت حسین ءَ گوشت کہ پی آئی اے ، پاکستان ریلویز، پاکستان سٹیل ملز ءُ ایندگر سرکاری ادارگ آنی برجائی، نوک سر جوڑیشت ءِ گامگیج کنگ بوھگ ءَ انت۔ ما اے ادارگ آناں حکومت ءِ چیر دستی ءَ یا پاکستان سٹیل ملز ءِ وڑ ءَ پبلک پرائیویٹ شریکدار آنی چیر دستی ءَ سیت مندیں ادارگ جوڑ کنگ ءِ واھشت ایگ آں۔
ڈاکٹر عشرت حسین ءَ گیش تران کت کہ سول سروسز ءِ گہتری کار ایشی سیمی بھر ءُ گامگیج انت۔ آئی ءَ گوشت گہتری کار آناں پکوئیں رنگ دیگ بوتگ ءُ بازین آناں پد ءُ رند ھم کنگ بوتگ۔ آئی ءَ گوشت کہ منی نز ءَ سول سروسز ءِ اندر ءَ کار کرد ءِ پٹ ءُ پول ءُ دیرموئی ءِ پالیشی، سول سروسز ءِ بنیاتی ھمزوری انت چیا کہ پیسر ءَ چہ ساڑیگیں پالیشی ءَ چہ ما جوانیں ءُ کار کردی بستاری سول سرونٹس ءَ پرک کت نہ کنت۔
آئی ءَ گوشت کہ مزور آنی ھمک سال کانفیڈنشل رپوٹ اے سی آر” ءِ چارگ ءُ پد ءُ رند ءِ مٹ ءَ مزورک آنی کار کرد ءَ را پٹ ءُ پول کنگ ءِ واستہ کار کردی ٹک آناں سہرا کنگ بوتگ۔ نوں ایوک ءَ سینارٹی ءِ رد ءَ پروموشن نہ بیت بلکینگ ءَ کار کرد ، ٹریننگ ءُ بستار ءِ رد ءَ پروموشن دیگ بیت۔ آئی ءَ گوشت کہ وھد ءِ پروموشن رولز ھم سہرا کنگ بوت گڈا آمید گس ءَ چیلنج ھم کنگ بوت گڈا پیسلہ کنگ بوتگ کہ رولز میرٹ ءِ سر ءَ جوڑ کنگ بہ بنت ءُ ایشی اندر ءَ اچ ردئی ھم نیست۔
آئی ءَ گوشت کہ سول سروس ریفارمز ءِ چیر دستی ءَ بنجاھی حکومت ءِ ھالیگیں پوسٹ 6 لکھ 40 ہزار ءَ چہ 5 لکھ 70 ہزار ءَ تاں کم کنگ بوھگ ءَ انت ءُ اے ھوالگ ءَ گریڈ یک ءَ تاں 16 ءِ 70 ہزار ھالیگیں پوسٹ آناں ھلاس کنگ بوھگ ءَ انت۔ آئی ءَ گوشت کہ اے رنگ ءَ کتگیں بچت ءَ چہ سول سرونٹس آنی پگار آناں ودینگ بیت۔
ھمے رنگ ءَ سینٹرل سپیئریر سروسز (سی ایس ایس) ءِ گہتری ءِ سر ءَ چار ءُ بچار کنگ بوھگ ءَ انت۔ آئی ءَ گوشت کہ گہتری ءِ پیکیج ءِ برجائی ءَ چہ پد پروفیشنلز آنی پروموشن ءِ موہ آناں ودینگ بیت۔ ما نیشنل ایگزیٹو سروس ءَ را لس مزدگر ءُ بلدکار آنی درجی بندی ءِ شور ءُ مشور دیگ ءَ آں۔
آئی ءَ گوشت کہ سی ایس ایس ءِ چکار ءِ کار رپک ءَ ٹوک سر گل جوڑیشت ءِ چیر دستی ءَ امیت وار آناں جست گرگ بیت کہ آ وتی دل دوستیں سبجیکٹ ءَ چکاس دیان ءَ وتی مستری ءَ سروس ءَ ھوار بوت کناں۔ گہتری کار آںی چارمی فیز ‘بھر’ ءِ ھوالگ ءَ ڈاکٹر عشرت حسین ءَ گوشت کہ کارگسی کار رپک ءَ را کوھنیں فائل سسٹم ءِ مٹ ءَ الیکٹرانک کارگس ورک (ای آفس) ءِ تہ ءَ مٹ کنگ بوھگ ءَ انت۔
پالیشی ادارگ برائے مھکمیں دیمروئی (ایس ڈی پی آئی) ءِ ایگزیکٹو ڈائریکٹر ڈاکٹر عابد قیوم سلہری ءَ ادارگ آنی گہتری ءِ ھوالگ ءَ گوشت کہ ادارگ آنی گہتری ایوک ءَ کانود ءُ پالیشی آنی مٹ ءُ بدلی ءَ نہ بیت بلکینگ ءَ ایش انتظام کار ءِ ھم است انت۔ آئی ءَ گوشت کہ گہتری ءَ را کامیات جوڑ کنگ ارزشتی انت۔
آئی ءَ گوشت کہ گہتری کار بھر آنی تہ ءَ برجائی یک وشیں گپ ات۔ آئی ءَ گوشت کہ ادار آنی گہتری ءِ چیر دستی ءَ ڈکال ءِ آماچیں سرکاری ادارگ آناں ضم یا ھلاس کنان ءَ ادارگ آنی کسا چار سد ءُ پنجاھ ءَ چہ کم کنان ءَ سئے سد ءُ پنجاھ ءَ آورتگ۔ جتا جتائیں ادرگ کہ یکیں کار ءَ کنگ ءَ انت ایشاناں مٹ کنگ ءِ ضلورت انت۔
ھمے رنگ ءَ سول سروسز ریفارمز ءِ ھوالگ ءَ ڈاکٹر عابد قیوم سلہری ءَ گوشت کہ اے رد ءَ ھم بھر آنی تہ ءَ گہتری کار جاڑی انت ایش جوانیں کار ات۔ آئی ءَ گوشت کہ گہتری کار آہستوک آہستوک ءُ ایشانی سرجمی المی ءُ دلجمی انت۔
آئی ءَ گوشت کہ گہتری کار ءِ مول ءُ مراد کار رپک ءُ انتظامی کار رپک ءِ تہ ءَ مٹ ءُ بدلی آرگ انت ءُ اے رد ءَ گہتری کار آں چہ ترسوکیں مردم آنہ لیکہ آناں در جنگ ھم المی انت چیا کہ ایشی ءَ ابید گہتری کار آں چہ لوٹ کتگیں آسر در جنگ بیت نہ کنت۔
