اسلام آباد۔ 05 مارچ (اے پی پی) وزیراعظم عمران خان پارینے کہ خراج اصلاحات نا مسخت خراج نا نظام ءِ آسان کننگ ءِ، اصلاحات آن خراج نا نظام اٹ ساڑی آ خامی تے مُر کننگک، خراج نظام ءِ داوڑ شین تننگک کہ کاروبار آسان و زرگزران شون ہلے۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او جمعہ نادے آ داڑے خراج اصلاحات نا بابت دیوان نا کماشی ءِ کرسا کرے۔ دیوان اٹی بنجائی وزیر اقتصادی امور مخدوم خسرو بختیار، بنجائی وزیر خزانہ ڈاکٹر عبدالحفیظ شیخ، بنجائی وزیر ڈٹ بندی و شونداری اسدعمر، بنجائی وزیر صنعت و پیدوار حماد اظہر، وزیراعظم نا سلاہکار واپار عبدالرزاق داؤد، وزیراعظم نا خصوصی کمکار ڈاکٹر عشرت حسین، ڈاکٹر وقار مسعود، تابش گوہر، ندیم بابر، چیئرمین زرکاری بورڈ و ایلوسینئر آفیسر آک ساڑی ئسر۔ دیوان آن تران کرسا وزیراعظم پارے کہ خراج اصلاحات نا مسخت خراج نا نظام ءِ آسان کننگ و نظام اٹ ساڑی خامی تے مُر کننگ ءِ۔ اوپارے کہ خراج ہلوک آتا صوابدیدی اختیار آتے کم کننگک۔ خراج نظام نا شفافیت ءِ پک کننگ کن آٹو میشن ءِ درستی راستی کرفنگک۔ وزیراعظم پارت کرے کہ فلائنگ انوائسز نا ویل آ خاص چکار کننگے و خراج نظام ءِ داوڑ شین تننگے کہ داڑآن کاروبار اٹ آسراتی مرے و زرگزران شون ہلے۔
