اسلام آباد۔ 05 مارچ (اے پی پی) وزیراعظم عمران خان نا کنڈآن ریاست مدینہ نا وژن نارداٹ سادگی و کفایت شعاری نا گام گیج آتا کمک اٹ وزیراعظم آفس نا خڑچ آتیٹی کمتی اتنگ نا قول انا رداٹ مالی سال 2020ء ٹی وزیراعظم آفس نا ہڑدے ئی (آپریٹنگ) خڑچ آتا مد اٹ نمان کمتی اتنگانے۔ وزیراعظم عمران خان اقتدار اٹ بننگ آن مست و وزارت عظمیٰ نا منصبءِ سنبھالنگ نا وخت آ وزیراعظم ہاؤس و وزیراعظم آفس نا خڑچ آتیٹی کفایت شعاری نا رداٹ مثال قائم کننگ نا قول کریسس، وزیراعظم عمران خان الس آن خراج آتا دروشم اٹ دوئی کروک قومی خزانہ نا رکھ اکن نئے بیرہ وزیراعظم ہاؤس و وزیراعظم آفس نا خڑچ آتیٹی نمان کمتی اتنگ نا قول ءِ پورو کرے بلکن الس نا پیسہ غاتا ممکنہ رکھ اکن ایلو حکومتی عہدیدار آتیکن ہم اسہ درور اس جوڑ کرے ہرا پک مالی سال 2019-20ء نا بجٹ و وزارت خزانہ نا دستاویز آتیان ہم مننگ ءِ، بجٹ و سرکاری دستاویز آتارداٹ وزیراعظم آفس کن آپریٹنگ خڑچ آتا مد اٹ مالی سال 2020ء ٹی 218 ملین روپئی جتا کننگاسس ولے کفایت شعاری نا اصول آتیا سلسا کل خڑچ آتا کچ 46 ملین روپئی ریکارڈ کننگانے ہراکساس مروک بجٹ آن بھاز کم ءِ۔ الس نا خراج آتیان دوئی پیسہ غاتا گچین و بامسخت کاریم اٹ اتنگ نا کمک اٹ سفر و ٹرانسپورٹ خڑچ آتا مد اٹ اسہ کروڑ روپئی نا بچت کننگانے۔ دستاویز آتا رداٹ سیل و سوات و تحائف نا مد اٹ مالی سال 2020اٹی 15 لکھ روپئی جتا کننگاسس ولے اسہ زموار سرکڑدہ نا درور ءِ قائم تخسا دامد اٹ کل خڑچ آک بیرہ اسہ ہزار روپئی ئسر دلچسپ ہیت دادے کہ اسہ ہزار روپئی ہم اکاؤنٹ ءِ برقرار تخنگ آ خڑچ مسنو۔ وزیراعظم نا پارت آ مادی اثاثہ جات نا مد اٹی 4 کروڑ روپئی نا بچت ءِ پک کننگا۔ ہنداوڑ ٹورخڑچ آتا مد اٹ 1.2 ملین روپئی وخت اس کہ متفرق خڑچ آتا مد اٹ 2 کروڑ روپئی نا بچت کننگا۔ بجٹ و سرکاری دستاویز آتا رداٹ کفایت شعاری نا رداٹ غٹ آن اہم و نمان کمتی صوابدیدی گرانٹ آتا مد اٹ مسنے، دامد اٹ مالی سال 2020ء کن اسہ ملین روپئی جتاکننگاسس ولے اصل خڑچ آک بیرہ اسہ ہزار روپئی ئسر واوہم اکاؤنٹ ءِ برقرارتخنگ آ خڑچ مسر۔ اُرائی ملازم آتا معاوضہ غاتا مد اٹ کم و ود 3 کروڑ روپئی نا بچت مسنے ہراکفایت شعاری نا وژن آ سلنگ نا گچین ءُ درور اسے۔ پرائم منسٹرز ایسٹیٹ گارڈن اسٹبلشمنٹ نا مد اٹ کم و ود اسہ کروڑ روپئی نا بچت ءِ پک کننگانے۔ ہروڑنا میزانیہ(بجٹ) اٹ اِراوڑنا مصارف مریرہ، اسٹ ملازم آتا بابت خڑچ وخت اس کہ ایلو آپریٹنگ خڑچ آک مریرہ۔ وزیراعظم آفس نا ملازم و کارندہ غاتا بابت خڑچ تنخواہ و الاؤنس آتیا تالان ءِ۔ مالی سال 2020ء ٹی وزیراعظم آفس نا ملازم و کارندہ غاتا بابت خڑچ آتیٹی زرس ودکی مسنے ہراملازم آتا سالانہ ترقی(انکریمنٹس) نا سوب آن مسنے، دا انکریمنٹ حکومتی ملازم آتا بنداوی حق ءِ، دا انکریمنٹ آتا سوب آن مالی سال 2020ء ٹی پی ایم آفس نا جم بجٹ اٹ پیوستہ مالی سال انا مقابلہ ٹی زرس ودکی مسنے ولے جم وڑاٹ ہروڑنا خڑچ آتیٹی کمتی ءِ پک کننگانے۔ بجٹ و سرکاری دستاویزآتارداٹ سرکاری خزانہ غا بھاریم ءِ کم کننگ نا رداٹ داتم اسکان وزیراعظم تینا آفس نا خڑچ آتے کم کننگ نا قول آ عملدرآمد کرینے۔ وزیراعظم عمران خان تینا دا طرز عمل آن ایلو سیاسی راہشون تیکن ہم اسہ مثال اس قائم کرینے کہ ہراوڑ کارکڑد آ سمجھوتہ کننگ آن بیدس بے المی خڑچ آتے کم کننگ مریک۔
