وزیراعظم عمران خان تون اوڑدہی ٹی پنی آ سیاسی شخصیت منیر احمد خان نا پاکستان تحریک انصاف اٹ اوار مننگ نا پڑو

اسلام آباد۔ 05 مارچ (اے پی پی) وزیراعظم عمران خان تون اوڑدہی ٹی پنی آ سیاسی شخصیت منیر احمد خان پاکستان تحریک انصاف اٹ اوار مننگ نا پڑو ءِ کرینے وخت اس کہ وزیراعظم پارینے کہ ملک اٹ کبینی و بیروزگاری تون اوار غٹ ویل آک مسکوہی حکومت آتا لٹ وپل و وڈی خوری نا سوب آن ءُ، ہروڑنا وڈی خوری ءِ چٹفنگ مشن ءِ داڑکن ہچ وڑنا نرمی و سمجھوتہ کننگپک۔ وزیراعظم میڈیا آفس آن جاری بیان نا رداٹ وزیراعظم ہاؤس اٹ مروک آ اوڑدہی ٹی منیر احمد خان وزیراعظم نا کماشی آ پورو پت انا درشانی ءِ کرے۔ داوخت آ بنجائی وزیر اقتصادی امور خسرو بختیار بنجائی وزیر سائنس و ٹیکنالوجی فواد چوہدری ئسک ہم ساڑی ئسر۔ داوخت آ وزیراعظم منیر احمد خان ءِ پارٹی ٹی بخیر اٹ پارسا پارے کہ ملک اٹ کبینی، بے روزگاری و افراط زر اتون اوار غٹ ویل آتا سوب مسکوہی حکومت آتا کنڈآن کروک آ لٹ وپل و وڈی خوری ءِ۔ کنا مشن ہروڑنا کرپشن نا چٹفنگ ءِ و داڑکن ہچ وڑنا نرمی و سمجھوتہ کننگپک۔ اوڑدہی ٹی منیر احمد خان وزیراعظم عمران خان نا کماشی آ پورو پت انا درشانی ءِ کرسا پارے کہ پاکستان نا تقدیر و آخبت وزیراعظم عمران خان نا بے مٹ سرکڑدہ نا دوٹی مننگ آن رکھ و روشنا ءِ۔ اوپارے کہ او بروک آ اسہ سال اٹ ملک اٹی بھلو و مثبت بدلی اس خننگ ءِ۔ منیر احمد خان پارے کہ ہرپاکستانی و خاص کر ورناچین داہیت آ گمر محسوس کیک کہ ملک انا باگ دوڑ ءِ ہمولیڈر سمبھالانے ہرانا دامن ساف و کرپشن آن پاک ءِ۔ اوپارے کہ وزیراعظم عمران خان تدوک آ اِرادہائی آن زیات وخت آن کرپشن، لٹ وپل و مافیاغاتون مون تننگ ءِ۔ اوپارے کہ وزیراعظم نا بے باک سرکڑدہ ئی و بے لوث جہد آن زہمی مرسا او پاکستان تحریک انصاف اٹ اوار مننگ نا فیصلہ کرینے تانکہ او دا مشن نا بشخ مننگ کے ہراڑکن عمران خان جہد کننگ ءِ۔