اسلام آباد۔ 05 مارچ (اے پی پی) ساڑی حکومت مالی مشکل و جہانی کہول آ تیل انا نہاد آتیٹی ودکی آن پد ہم الس ءِ پٹرولیم مصنوعات آتا نہاد آتیٹی زیات آن زیات ریلیف تسنے و داوخت آ ہم پاکستان اٹ ڈیہہ نا ایلو ملک آتا مقابلہ ٹی تیل انا نہاد آک کم ءُ۔ پٹرولیم ڈویژن نا حوالی نا رداٹ ساڑی حکومت نا دا کوشست مسنے کہ جہانی منڈی ٹی تیل انا نہاد آتیٹی ودکی آن پد ہم الس آ بھاریم شاغنگپ۔ داوخت آ پاکستان اٹ سری لنکا، نیپال، بنگلہ دیش و بھارت تون اوار ڈیہہ نا ایلو ملک آتا نسبت پٹرولیم مصنوعات اڑزآن ملنگ ءِ۔ داملک آتیٹی پٹرولیم نا فی لیٹر نہاد 0.83ڈالر آن 1.26 ڈالر فی لیٹر اسکان ءِ وخت اس کہ پاکستان اٹ پٹرولیم 0.70 ڈالر فی لیٹر اٹ ملنگ ءِ۔ سری لنکاٹی پٹرولیم نا نہاد 0.83ڈالر، نیپال اٹ 0.95ڈالر، بنگلہ دیش اٹ 1.05ڈالر، بھارت اٹ 1.26ڈالر، چین اٹ 1.03ڈالر، برطانیہ 1.70ڈالر و جرمنی 1.64ڈالر فی لیٹر ءِ۔ بھارت اٹ پٹرولیم نا نہاد آ ہڑدے ئی بنداو آ نظرثانی کننگک وخت اس کہ اونا برعکس پاکستان نا نہاد اٹ ہر 15 دے آن پد تعین کننگک و حکومت جہانی کہول آ تیل انا نہاد اٹ ودکی نا حالیت اٹ ہم ملک اٹ پٹرولیم مصنوعات آتا نہاد آتے ودفنگ نا جاگہ غا مالی بھاریم ءِ تینٹ سگنگ نا پالیسی ءِ اختیار کرینے و بھاز المی حالیت آتیٹی ہم الس ءِ کم آن کم ودکی منتقل کننگک۔ دابابت دنیا نا 167ملک آتا فہرست اٹ اڑزآن پٹرولیم مصںوعات فراوان کروک آ ملک آتیٹی پاکستان نا نمبر 18 می ءِ۔ وزیراعظم عمران خان ہندا پندرھواڑے ٹی ہم الس ءِ ریلیف فراوان کننگ کن پٹرولیم مصنوعات آتا نہاد آتیٹی ودکی کن اوگرا نا کنڈآن گدریفوک آ سمری ءِ مسترد کرے۔ اوگرا دا چرجوئی ٹی پٹرولیم نا نہاد اٹ 6 روپئی 22 پیسہ، ہائی اسپیڈ ڈیزل نا نہاد اٹ 6 روپئی 82 پیسہ، گازلیٹ نا نہاد اٹ 6 روپئی 37 پیسہ و لائٹ ڈیزل نا نہاد اٹ 5 روپئی 78 پیسہ فی لیٹر ودکی نا سمری ءِ گدریفیسس ہرادے وزیراعظم منظور کتو و پٹرولیم مصنوعات نا نہاد آتے برقرار تخنگانے۔ پاکستان تحریک انصاف نا حکومت مسکوہی حکومت آتا دور اٹ پٹرولیم مصنوعات آتا نہاد آتا تناسب آن نہاد ءِ کم آن کم تخنگ نا حکمت عملی اختیار کرینے تانکہ الس ءِ زیات آن زیات ریلیف تننگ مرے۔
