اسلام آباد۔ 05 مارچ (اے پی پی) بنجائی دارالحکومت اسلام آباد اٹی جمعہ نادے آ مسہ دے ئی سیل وسواتی خاہوتی میلہ بناکرے۔ مسہ دے ئی فیسٹیول اٹ اسلام آباد و ایب وکیب انا شاری تے سیل وسوات نا گچین آسراتی دُوبریک وخت اس کہ بنجائی وزیر آک پاریر کہ شاری تیکن وزیراعظم نا خاص پارت آ شاندار ءُ میلہ اس اڈتننگانے، میلہ ٹی چناک و زالبول آتا است خواہی کن ایونٹ آتا بناءِ کننگانے۔ شاری تیان خواست ءِ کہ او پبی وڑاٹ بشخ ہلیر۔ جمعہ نادے آ ایف نائن پارک اٹ میلہ نا رنگ برنگی بنائی دوداس مس ہراٹی بنجائی وزیر حوالکاری وشینکاری سینیٹر شبلی فراز، وزیر سول ایوی ایشن غلام سرور خان، وزیر توانائی عمرایوب خان، وزیر بین الصوبائی رابطہ ڈاکٹر فہمیدہ مرزا، وزیر ڈٹ بندی و شونداری اسدعمر، وزیراعظم نا خصوصی کمکار سمندر پار پاکستانیز ذلفی بخاری، پاکستان پیراگلائیڈز ایسوسی ایشن نا عہدیدار آتون اوار شاری تا بھلو کچ اس بشخ ہلکر۔ داوخت آ گپ وتران کرسا وزیر حوالکاری سینیٹر شبلی فراز پارے کہ شاری تیکن وزیراعظم نا خصوصی پارت آ شاندار ءُ میلہ اس اڈتننگانے۔ میلہ ٹی ملکی و درملکی مندوبینک شریک ءُ۔ میلہ نا بست وبندءِ نجی بشخ کرے و حکومت پبی کمکاری کرینے۔ اوپارے کہ پیراگلائیڈنگ اسُل کبین ءُ شونق اس اف، ورناک دا گوازی ٹی بشخ ہلیر۔ بنجائی وزیر بین الصوبائی رابطہ فہمیدہ مرزاپارے کہ اولیکو وار اسپورٹس و سیل و سواتی بشخ اواری اٹ فیسٹیول نا بست وبندءِ کننگ ءُ۔ اسلام آباد و پاکستان نا الس مبارکباد نا حقدار ءُ۔ دا فیسٹیول داہیت انا پیدواری ءِ کیک کہ ملک اٹ امن و ایمنی نا حالیت بھاز جوان ءِ۔ دا فیسٹیول آن سیل و سوات و گوازی تا تجدید مننگ ءِ۔ دانا اڈتننگ آ پیراگلائیڈرز ایسوسی ایشن ءِ ہم مبارکبادی ایتنہ۔ اوپارے کہ دا فیسٹیول کن اوتینٹ پرجوش ءِ۔ ننا سلہ غا دبئی آن ہر سیکٹر اٹ تینا پن ءِ جوڑ کروک آ سکینہ ہم بسنے۔ فہمیدہ مرزا شاری تیان خواست کرے کہ او پبی وڑاٹ فیسٹیول اٹ بشخ ہلیرہ۔ مسہ دے ئی میلہ ٹی چنا و زالبول آتیکن سیل وسوات نا وارخواہی ساڑی ءِ۔ اوپارے کہ مسہ دے انا دا رنگ برنگی محفل اٹ شاریک پاکستان نا جشن ءِ منائفر۔ وزیراعظم نا داموقف ءِ کہ سیل و سوات ننا است آن خڑک ءِ۔ داوخت آ بنجائی وزیر عمرایوب خان پارے کہ اولیکو وار سلہہ بند فوج انا اسکائی ڈیورز آک ہم ٹورازم ایکسپو ٹی بشخ ہلنگ ءُ۔ چترال آن پیراگلائیڈر اینو آن بناکروک آ مسہ دے ئی سیل و سواتی میلہ ٹی بشخ ہلنگ ءُ۔ اوپارے کہ گلگت بلتستان تون اوار مچ آ ملک اٹ پیراگلائیڈنگ نا است بڈی ءِ کننگک انتئے کہ دا سیل و سوات نا مون آ دننگ نا اہم ءُ ذریعہ اسے۔ گوادر اٹی ہم داوڑنا دود اڈتننگک۔ ذلفی بخاری پارے کہ میلہ ٹی پیراگلائیڈنگ، پیراٹروپنگ، چناتا کُن و خور انا اسٹال و کُن وخور انا گڑاہم ملک۔ مسہ دے ئی فیسٹیول اٹ چناتا است خواہی کن چندی ایونٹ تخنگانے۔ میلہ ٹی نہادی گاڈی تا نمائش ، چناتا گوازی و کُن و خور انا گڑاارے۔ غلام سرور خان پارے کہ پیراگلائیڈرز ایسوس ایشن نا منت وار اُن ہرا دا فیسٹیول نا زمواری ءِ ہرفے۔ پیراگلائیڈرز ایسوسی ایشن نا سلاہ دافیسٹیول آن پد اونازموار آتون اوڑدہی کرسا داڑآ سجفنہ تانکہ سیل و سوات نا گچینی کن اواری اٹ کاریم کننگ کین۔ اوپارے کہ میڈیا سیل و سوات نا مون آ دننگ کن داایونٹ ءِ پبی کوریج کے۔
