شونداری ناغٹ کسرک بلوچستان آن پیش تمرہ ، پاکستان ایشیاناٹائیگر و بلوچستان پاکستان نا ٹائیگر جوڑ مریک، گوادر اٹی گچین ئُ یونیورسٹی و پوسکن ئُ ہسپتال اڈ تننگک، بجلی نا ڈٹ آتیا ترندی اٹ کاریم برجائِ ،
گوادر۔ 16مارچ (اے پی پی) وزیراعظم محمد نواز شریف پارینے کہ شونداری نا غٹ کسرک بلوچستان آن پیش تمرہ ، پاکستان ایشیانا ٹائیگر جوڑ مریک و بلوچستان پاکستان نا ٹائیگر جوڑ مریک، گوادر اٹی گچین ئُ یونیورسٹی و پوسکن ئُ ہسپتال اڈتننگک ، داجاگہ نا الس نا جوش و جوزہ ٹی اومیت نا بھلو روشنائی اس نظر بننگئِ ، حقی وڑاٹ محسوس کننگ اُن کہ گوادر کن مثالی شونداری نا دور بناءکننگ ئِ و داعلاقہ نا تقدیر بدلینگ انگ والا ئِ۔ پنچ شنبے آ داڑے السی جلسہ آن تران کرسا وزیراعظم پارے کہ ہچ ئُ دُن ئُ دے اس گدرینگپک ہراٹی گوادر نا ذکر مف، بلوچستان اٹی روڈ آتا جوڑ جاڑ کن ارب آ روپئی خڑچ کننگ اُن۔ شونداری نا سوب آن دہشت گرد آک نرنگ ئُ اوفتے نرفسا دم کشون، بجلی نا ڈٹ آتیا ترندی اٹ کاریم برجائِ زوت تہاریک چٹرہ۔ گوادر نا ڈغار خیسن آن زیات نہادی مسنے ڈغار تا اصل مالک آک بایدے علاقہ نا شونداری ٹی بشخ ہلیر۔ اوپارے کہ گوادر اٹی زوت پوسکن ئُ یونیورسٹی اس اڈ اتینہ داڑکن موضع شابی ٹی 500 ایکڑ ڈغار ہلنگانے ، داڑکن اسہ ارب روپئی خڑچ مریک ، گوادر اٹی پوسکن ئُ ہسپتال جوڑ جاڑ کننگک، نیزگار خلقت ئِ ہیلتھ کارڈ ہم جاری کننگک و نیزگار خلقت نا درمان ئِ مفت کننگے، گوادر نا 50 ورناتے چینی بولی ہیل تننگ کن چین آ گدریفنہ و داجاگہ نا 50 ورناتے ملک انا گچین یونیورسٹی تیٹی داخلہ تننگک، گوادر نا روڈ، گلی و سیوریج نا نظام نا گچینی کن اسہ ارب روپئی خڑچ کننگک۔ اوپارے کہ 1991ءٹی خواہش ئس کہ گوادر دنیا نا گچین آ مثالی شار جوڑمرے نن دا چرجوئی ٹی کاریم نا بنائِ کرین ولے ننا کسراٹی اڑاند آک بسر و ننا حکومت ئِ چٹفنگا۔ دورآمریت اٹی گوادر نا الس ئِ گیرام کننگا نن تینا ہر دور اٹی گوادر ئِ یات تکان و اینو گوادر شونداری نا کسر آ روان ئِ۔ اولیکو وزیراعظم اُٹ ہراگوادر اٹی اسہ نن اس اڈ کریٹ، کوئٹہ ئِ ملک انا ایلو علاقہ غاتون ملفنگ کن شاہراہ تا جال اس شاغنگک و گوادر چین اتون گنڈنگک۔ روڈ آتا جوڑ مننگ آن تعلیم، جان جوڑی و واپار ئِ مون آدننگ ملک، شونداری و شونہالی بریک، بے روزگاری چٹک، شاہراہ تیان بیدس یونیورسٹی و ہسپتال آک جوڑ مننگ کپسہ، بلوچستان اٹی 1100 کلومیٹر روڈ جوڑ جاڑ کننگ اُن، ننا دور آن مست پاکستان اقتصادی تنزلی آ ئس، لوڈشیڈنگ ، دہشت گرد ی عروج آ ئس، خزانہ خورک ئس، صنعت وکارخانہ غاک بند ئسر الس بدحال ئس، نن خلتون و ملک ئِ دُوارہ ٹریک آ پدی اتنگ کن عزم اتون کاریم نا بنائِ کرین۔ نن 2013ءٹی دُوارہ برسراقتدار برسا حالیت آتیا چکارتخان ، شونداری ڈٹ آتا جوڑ جاڑ آن بلوچستان شونداری نا زیبائُ ندارہ پیش کیک۔ اوپارے کہ شونداری نا غٹ کسرک بلوچستان آن پیش تمرہ۔ وزیراعظم پارے کہ سی پیک شاہراہ امن و انسانیت ئِ سی پیک نا بھلا بشخ بلوچستان نا گل زمین آٹی ئِ و دا بلوچستان نا محرومی تے مُر کننگ نا ذریعہ جوڑ مریک، شونداری ڈٹ آتا سوب پاکستان ایشیانا ٹائیگر جوڑ مریک و بلوچستان پاکستان نا ٹائیگر جوڑمریک۔ اوپارے کہ بلوچستان اٹی شاہراہ تا جوڑ جاڑ اٹی ایف ڈبلیو او نا ستائِ کرے و پارے کہ بلوچستان نا شونداری ٹی قربانی تروک آ غٹ ادارہ غاتا صفت نا حقدار ئُ۔ اوپارے کہ شاہراہ تے ملک انا ایلو علاقہ غاتون گنڈسا شونداری نا رفتار اٹی ودکی کننگک۔ بلوچستان آن احساس محرومی مر مریک۔ وزیراعظم پارے کہ مچ آ پاکستان نا شونداری نا سیبو بلوچستان آ مریک۔ داڑے بجلی نا کارخانہ غاک لگنگ ئُ ، گوادر اٹی ہم بجلی نا کارخانہ اڈتننگک ہرا نئے بیرہ گوادر بلکن دامون ایمون نا علاقہ غاتا بجلی نا گرج آ تے پم پورو کیک۔ بلوچستان نا شونداری ٹی وزیراعلیٰ ثناءاللہ زہری تون تفوک اُٹ۔ اوپارے کہ گوادر اٹی چنا تے کن بایدے تعلیم مرے۔ وزیراعظم پارے کہ بیرہ تقریر کرسا پدی ہِننگ کنا شیوہ اف، انتس کہ پاوہ اوڑآ عمل کرسا نشان ایتیوہ۔ اوپارے کہ گوادر نا خلقت کن ہیلتھ کارڈ جاری کننگک تانکہ نیزگار آتے مچ آ پاکستان اٹی درمان نا مفت آسراتی دوبرے، چین اتون اواری اٹ 300 کٹ آتا پوسکن ئُ ہسپتال اس جوڑ کننگک۔ اوپارے کہ سی پیک نا رداٹ ڈٹ آتیٹی سور انگا دیر ئِ صاف کننگ نا پلانٹ ہم اوار مریک تانکہ خلقت ئِ کنوئی ئُ صاف دیر تننگے۔ اوپارے کہ ننا مسہ نیم سال انا دور اٹی بلوچستان نا شونداری کن اخس کہ کاریم مس اوفتا تاریخ اٹی ہچ ئُ مثال اس ملپک۔ اوپارے کہ گوادر ڈویلپمنٹ اتھارٹی و چیئرمین ضلع کونسل اوار ی اٹ فیصلہ کیرہ کہ گوادر اٹی روڈ، گلی، و سیوریج نا گچینی کن گام گیج کننگے۔ اوپارے کہ دامسخت کن 100 کروڑ روپئی نا گرانٹ جاری کننگک ہرا منہ دے اٹی فراوان کننگک ۔ اوپارے کہ گوادر نا شونداری بلوچستان نا شونداری ئِ و بلوچستان نا شونداری پاکستان نا شونداری ئِ۔ وزیراعظم پارے کہ گوادر نا شونداری اینو نا مشن اف ، 1991ءٹی ہراتم ای وزیراعظم مسٹ تو ای پاریٹ کہ گوادر پاکستان نا پورٹ سٹی جوڑ مریک۔ اوپارے کہ نن گوادر و بلوچستان نا شونداری کن بھلو گام گیج ئُ۔ اوپارے کہ ہراتم روڈ آک جوڑمریرہ تو اوکان پد شونداری بریک ، روڈ آتا جوڑ مننگ آن پد ہسپتال ، اسکول آک جوڑ مریرہ، روڈ آک جوڑ مریرہ و ہراتم نیزگاری چٹک تو قومک شون ہلیرہ۔ اینو الحمداللہ گوادر آ نناحکومت و صوبائی حکومت بھاز چکار تخانے۔ اووزیراعلیٰ بلوچستان ئِ باوری ترفے کہ بلوچستان نا شونداری ٹی ناگام اتون گام ہرفیوہ۔ اوپارے کہ گوادر نا ڈغار خیسن آن زیات نہادی مسنے۔ اینو داڈغارتیان کروڑ، ارب ، کھرب روپئی نا فائدہ ہرفوک آ ہندی خلقت آک افس، ہندی خلقت آتے انت ملا اوفتا حالیت ہندن آن ہندن ئِ۔ اوپارے کہ دا نیزگار ڈغار مالک آتے ہم گوادر نا شونداری ٹی بایدے بشخ اس ملے۔ داجاگہ نا اصل باتی تے بایدے اوفتامعاوضہ ملے تانکہ نا انصافیک چٹر۔ ہندی خلقت نا زند انا آب ئِ ودفنگ بھاز المی ئِ داڑے بایدے گچین ایجوکیشن مرے۔ اوپارے کہ گوادر نا یونیورسٹی اسلام آباد نا یونیورسٹی تیان بایدے جوان مریر تانکہ اسلام آباد تون اوار ایلو علاقہ غاتا خلقت ہم گوادر آ برسا تعلیم حاصل کیر۔ اوپارے کہ انشاءاللہ تعالیٰ بھاز زوت سی پیک نا رداٹ داڑے صاف دیرگوادر نا السئِ تننگک و ہردے ئی 50 لکھ گیلن دیر مہیا مریک۔ اوپارے کہ سور انگا دیر ئِ صاف کننگ نا ڈٹ آ 5 ارب روپئی خڑچ مریک ہرا فتے بنجائی حکومت ایتک۔ اوپارے کہ گوادر نا 50 ورناتے چینی زبان نا ہیل تننگ کن چین آ گدریفنگک ۔ ہرافتے ٹی چناو نیاڑی و ورناک ہم اوار مریرہ۔ اوپارے کہ ای چناتتون پاوہ کہ او ہم تعلیم نا دوئی ٹی بریبر نا بشخ ہلیر۔ اوپارے کہ ننا دین اٹی پاننگانے کہ اگہ تعلیم حاصل کننگ کن چین آ ہم ہنوئی تمے تو ہنبو۔ داکان مست بنجائی وزیر ریاستیں و سیمی امورلیفٹیننٹ جنرل (ر) عبدالقادر بلوچ لس جلسہ آن تران کرسا پارے کہ گوادر نا شونداری تغ آن حقیقت نا دروشم اس مسنے ، ہرا بیرہ وزیراعظم محمد نواز شریف نا چکار نا سوب ممکن مس۔ اوپارے کہ بلوچستان نا الس نا مایوسی اومیت اٹی بدل مسنے۔ اوپارے کہ محمدنواز شریف بلوچستان نا الس نا احساس محرومی ئِ چٹفے۔ بنجائی وزیر پارے کہ گوادر نا الس محمد نواز شریف نا دوتے سوگو کیر، مایوسی وخت اس ہم ملیپک اوپارے کہ وزیراعظم نا وژن نا سوب اینو فاصلہ چنک مسنے، اوپارے کہ سیکورٹی فورس وہندی خلقت نا قربانی تیان ملک اٹی امن مس۔ اوپارے کہ دنیا نا 60 آن زیات ملک آک گوادر اٹی است خواہی ظاہر کننگ ئُ۔ بنجائی وزیر پارے کہ سی پیک آن گوادر تون اوار مچ آ ملک اٹی شونداری نا اسہ پوسکن ئُ دور اس بناءکرینے۔ جلسہ ٹی بنجائی وزیر شونداری و ڈٹ بندی و اصلاحات احسن اقبال، بنجائی وزیر ریلوے خواجہ سعد رفیق و گورنر بلوچستان محمد خان اچکزئی ئسک ہم ساڑی ئسر۔ ایسر اٹی وزیراعظم ساڑی مروک آ جلسہ گاہ آتون اواری اٹ پاکستان زندہ باد بلوچستان زندہ باد و گوادر پائندہ باد نا نعرہ ئِ خلکر۔
