کوئٹہ۔ 05 مارچ (اے پی پی) پاکستان تحریک انصاف بلوچستان نا سینئر راہشون نظر زردان پارینے کہ ساڑی آ سینیٹ نا گچین کاری تیٹی پاکستان تحریک انصاف غٹ آن بھلا سیاسی جماعت مرسا مون آ بسنے۔ سینیٹ نا گچین کاری تیٹی اپوزیشن جماعت آک پیسہ غاتا زور آ سید یوسف رضاگیلانی ءِ سرسہبی ترفیر، وزیراعظم تینا اعلیٰ ظرفی و اخلاقی قدر ءِ مون آ تخسا ایوان آن پت انا وونٹ ہلنگ نا فیصلہ کرینے۔ داخیال آتا درشانیءِ او جمعہ نادے آ’’اے پی پی‘‘ تون گپ وتران کرسا کرے۔ اوپارے کہ سینیٹ نا ساڑی آ گچین کاری تیٹی پی ٹی آئی تینا سیوتی جماعت آتون اواری اٹ بشخ ہلک و مچ آ ملک آن سینیٹ نا گچین کاری تیٹی پبی سرسہبی دوئی کرے و سینیٹ اٹ پاکستان تحریک انصاف اسہ بھلو سیاسی جماعت اس مرسا مون آ بسنے، پی ڈی ایم اٹ اوار جماعت آک حفیظ شیخ ءِ شکست ترفنگ کن پیسہ غاتے دیر آنبار وہیفیر۔ اوپارے کہ وزیراعظم عمران خان نا حوصلہ ءِ کہ او تنیا کیہی پڑتیا الس نا حق و ملک انا شونداری کن جنگ تننگ ءِ۔ اوپارے کہ پاکستان تحریک انصاف نا کارندہ غاک اینو ہم عمران خان تون سلوک ءُ ہرایکسر تنیا مچ آ سسٹم و اوٹی اودیم خرابی، بے ایمانی تے ایکسپوز کرسا تخانے۔ اوپارے کہ وزیراعظم نا کنڈآن قومی اسمبلی آن پت انا وونٹ ہلنگ ستاکڑزوک ءُ گام اسے، عمران خان نا پت انا وونٹ ہلنگ نا فیصلہ غان کارندہ غاتا است آتیٹی پین زیات مسنے۔ اوپارے کہ انشاء اللہ جیت عمران خان و حق و سچائی نا مریک۔
