اسلام آباد۔4مارچ (اے پی پی): مزن وزیر عمران خان ءَ گوں اقتصادی کمکی گل (ای سی او) ءِ باسکیں ملک آنی نیام ءَ جتا جتائیں شوبگ آنی کمک آنی دیمروئی دیگ ءِ واستہ 6 ٹکی ایجنڈا پیش کنان ءَ گوشت کہ مھکمیں دیمروئی ء، واستہ دیمروئی کمک المی انت، مارا وتی سیم سر آنی ارزشت، اقتصادی مڈی ءُ سیاسی رابطہ آں چہ سیت چست کنگ لوٹ ایت، کورونا وڑیں جیڈھ آں گوں گر ءُ چیل بوھگ ء، واستہ جان سلامتی ءِ شوبگ ءَ را گیش دیمروئی دیگ لوٹ ایت، سی پیک ءِ وسیلگ اوگانستا ءَ ھوار رودراتکی نیامجی ءَ تاں پجاری ارزشتی دار ایت۔ پاکستان ، اوگانستان ءُ ازبکستان ءِ نیام ءَ تیلوے رابطہ ءَ چہ تجارت ءِ دیمروئی ءَ کمک رسیت، کورونا ھوپ ءَ چہ رکھگ ءِ وستہ میاں اوستمانی تک ءَ ویکسین ءِ ھمکچی پجاری ضلوری انت، اوگانستان ایمنی کار پڑ ءَ مھکمیں دیمروئی ءَ کمکار سہرا بنت۔ اے ھیالانی درشانی آئی ءَ پنچ شمبے ءِ روچ ءَ ای سی او ءِ 14 چاردھمی سروک دیوان ءَ گوں ورچوئل گشتانک دیان ءَ کت۔ اے موہ ءِ سر ءَ مزن وزیر عمران خان ءَ ترکی ءِ صدر رجب طیب اردوان ءَ را اقتصادی کمکی گل ءِ 14 چاردھمی سروک دیوان ءِ واستہ سروکی سیٹ ءَ نندگ ءِ پد ءَ مبارک بات پیش کت ءُ گوشت کہ ای سی او ءِ آیوکیں دیوان ترکمانستان ءَ بیت۔
