پشاور۔ 04 مارچ (اے پی پی) وزیر مملکت و چیئرمین زرکاری بورڈ عاطف بخاری پارینے کہ حکومت ملک اٹی زرکاری، جامع زرگزرانی و صنعتی شونداری، روزگار نا پوسکن ءُ وارخواہی ودی کننگ و برآمدی پیدوار ءِ مون آ دننگ کون آ ہدف آتا دوئی کننگ کن کوشست کننگ اٹی ءِ، سی پیک نا رداٹ اقتصادی زون تا جوڑ کننگ آن اسہ شونہال و صنعتی پاکستان اس جوڑ مریک۔ داخیال آتا درشانیءِ او پشاور نا اسہ ہندی ہوٹل اسے ٹی پنچ شنبے نادے آ بنجائی زرکاری بورڈ انا کنڈآن اڈ ہلوک آ سی پیک صنعتی کمکاری کانفرنس آن تران کرسا کرے۔ عاطف بخاری پارے کہ اقتصادی زونک اسہ شونہال و صںعتی پاکستان نا سوب مریرہ، سی پیک نا ارٹ میکو ریسہ ٹی نجی بشخ مون آ برسا سرکڑدہ ئی کڑد ادا کے۔ اوپارے کہ دا زون تیٹی ٹیکسٹائل انجینئرنگ، بجلی و الیکٹرانکس، کیمیکل پینٹ، کشت وکشار و فوڈ پروسیسنگ، اسٹیل و پیکجنگ نابشخ اٹ صنعت جوڑ کننگک۔ پاک چین جغرافیائی قربت دا اقتصادی زون تا آبادکاری و تین پہ تینی زرگزرانی فائدہ غاتا دوئی کننگ اٹ کمکار جوڑ مننگ ءِ۔ اوپارے کہ زرکاری بورڈ اقتصادی زون تےغٹ آسراتی تا فراوانی وآسودہی تننگ ناعمل ءِ ترند کرینے۔ اوپارے کہ داوڑنا پالیسی جوڑ کننگ ننا اولیت ءِ ہرافتیان براہ راست درملکی زرکاری اتنگ مرے۔ ہراڑکن زرکاری بورڈ پنچ بشخ آتے اولیت تننگ ءِ ہرافتے ٹی آئی ٹی انڈسٹری، ہاؤسنگ و تعمیرات، فوڈ پراسیسنگ و کشت وکشار، سیل و سوات و لاجسٹک اوار ءِ۔ خیبر پختونخوا نا زرکاری بورڈ انا چیف ایگزیکٹو آفیسر حسن داد کانفرنس آن تران اٹی پارے کہ پاک چین اقتصادی راہداری نا رداٹ خیبرپختونخوا نا اہم ڈٹ رشکئی خصوصی اقتصادی زون اٹ ترندی اٹ کاریم برجاءِ۔ اوپارے کہ اسہ ہزار ایکڑ ڈغار آ تالان دا زون صوبہ ٹی ترند رفتار صنعت کاری نا مون آ دننگ کن مزل نا نشان مریک۔ اوپارے کہ بنجائی حکومت نا ڈٹ انا رداٹ دازون ءِ ریسہ غاتیٹی پورو کننگک و داڑکن 210 میگاواٹ بجلی مسہ ریسہ غاتیٹی حکومت فراوان کیک۔ دازون اکن 1203 ملین روپئی گیس انا مد اٹ تخنگانے۔ اوپارے کہ اولیکو ریسہ ٹی 247 ایکڑ، ارٹ میکو ریسہ ٹی 355 و مسٹ میکو ریسہ ٹی 399 ایکڑ ڈغار ڈویلپ کننگک۔
