اسلام آباد۔ 04 مارچ (اے پی پی) وزیر خارجہ شاہ محمود قریشی پنچ شنبے نادے آ نارویجن ہم منصب ایرکسن سورادے تون ٹیل فون آ رابطہ کرے۔ ترجمان دفتر خارجہ نا رداٹ گپ وتران اٹی ہڑتوم آ کنڈآتا تعلقداری، ڈیہہ نا حالیت، اہم علاقائی و جہانی باندات و واپار، زرکاری وتوانائی تون اوار چندی بشخ آتیٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا باندات آتیا گپ وتران کننگا۔ شاہ محمود قریشی پارے کہ پاکستان ناروے تون ہڑتوم آ کنڈآتا تعلقداری تے خاص اہمیت ایتک۔ وزیر خارجہ پاکستان و ناروے نا نیام اٹ واپاری کمکاری نا ستاءِ کرے و پاکستان اٹ ناروے نا زرکاری آ است جمی نا درشانی ءِ کرے۔ وزیر خارجہ پارے کہ نارویجین کمپنیک پاکستان اٹی زرکاری نا کمک اٹ، ننا کاروبار دوست پالیسی تیان فائدہ ہرفنگ کیرہ۔ وزیر خارجہ ناروے نا وزیر خارجہ ءِ اوغان امن عمل اٹ پاکستان نا خیرخواہی کڑد آن معلومدار کرسا پارے کہ پاکستان ڈیہہ ٹی امن نا کوشست آتیٹی کمکاری کن سنبرینگوک ءِ۔ ناروے نا وزیر خارجہ سکاٹیک و نظام انرجی نا نیام اٹ سولر انرجی ڈٹ انا معاہدہ ٹی حکومت پاکستان نا کڑد انا ستاءِ کرے۔ ناروے نا وزیر خارجہ ناروے ٹی رہینگوک آ پاکستانی کمیونٹی نا مثبت کڑد انا ستاءِ کرے۔
