اسلام آباد۔ 04 مارچ (اے پی پی) وزیر خارجہ مخدوم شاہ محمود قریشی پارینے کہ پاکستان یورپی یونین اسیجائی اقتصادی کمیشن، ننا ہڑتوم آ کنڈآتا سوگو اقتصادی رابطہ غاتا درشانی ءِ۔ داہیت ءِ او پنچ شنبے نادے آ وزارت خارجہ ٹی پاکستان اٹی تعینات یورپی ملک آتا سفیر آتون اوڑدہی ٹی پارے۔ شاہ محمود قریشی پارے کہ یورپی ملک آک ننا غٹ آن بھلا واپاری سیوتیک ءُ وخت اس کہ پاکستان اٹ زرکاری نا گچین وارخواہی ارے۔ وزیر خارجہ پارے کہ کورونا دین انا سوب آن زرگزرانی مشکل آتیان پد ہم یورپی کمپنی تا کنڈآن پاکستان اٹ زرکاری نا کچ اٹ خاطرخواہ ودکی مسنے و ننا ہڑتوم آ کنڈآتا واپار ءِ مون آ دننگ رسینگانے۔ اوپارے کہ پاکستانی تا اسہ بھلو کچ اس یورپی ملک آتیٹی رہینگ انگ ءُ ہرا ننا ہڑتوم آ کنڈآتا اقتصادی رابطہ غاتا مون آ دننگ اٹ کمکار مننگ کیرہ۔ وزیر خارجہ پارے کہ نن ای اے ڈی نا کمک اٹ 2021ء نا پلان اس شین تننگ اُن تانکہ یورپی ملک آتون اسیجائی اقتصادی کمیشن تے پین فعال و بامسخت جوڑ کننگ مرے۔ نن یورپی ملک آتا کاروباری خواجہ غاتے ای ویزہ آسراتی تننگ تون اوار اوار، اوفتے ہروڑنا آسراتی تننگ کن کوشست کننگ اُن۔ اوپارے کہ پاکستان یورپی یونین اسیجائی اقتصادی کمیشن، ننا ہڑتوم آ کنڈآتا سوگو اقتصادی رابطہ غاتا درشانی ءِ۔ ننا دا کوشست آتا سوب کاروبار اٹ آسراتی فراوان کننگ نا جہانی رینکنگ اٹ پاکستان نا درجہ بندی 39 درجہ اسکان ودانے۔ اوپارے کہ اقتصادی کمکاری ءِ مون آ دننگ، ہڑتوم آ کنڈآتا تعلقداری تے سوگو کننگ اٹ اہم کڑد ادا کیک، نن ٹیکنالوجی ءِ کاریم اٹ اتسا’’روشن ڈیجیٹل اکاؤنٹ‘‘ نا بناءِ کرین، دا گام گیج اٹی پاکستانی پردیسیک اول منہ تُو اٹی 50 ملین ڈالر زرمبادلہ گدریفیر۔ وزیر خارجہ پارے کہ ننے ہڑتوم آ کنڈآتا واپار نا کسر اٹ بروک آ ویل آتا زوت ایسری کن اسہ اسیجائی امنائی لائحہ عمل اس طے کننگ نا گرج ءِ۔ ننکن غٹ ملک آک اہمیت تخرہ، ہڑتوم آ کنڈآتا تعلقداری تے سوگو کننگ کن ادارہ جاتی کمکاری ءِ مون آ دننگ بھاز اہم ءِ۔ یورپی یونین نا کنڈآن پاکستان کن جی ایس پی پلس اسٹیٹس ملنگ آن پد یورپی ملک آتون ننا واپار نا کچ اٹی اِراہنداخہ ودکی مسنے۔ پاکستان اٹ تعینات یورپی ملک آتا سفیر آک وزیر خارجہ مخدوم شاہ محمود قریشی نا منت واری ءِ ہرفسا، پاک یورپی یونین ہڑتوم آ کنڈآتا زرگزرانی کمکاری ءِ مون آ دننگ کن تینا کمکاری نا باوری ءِ کرفے۔
