گوادر۔ 16مارچ (اے پی پی) وزیراعلیٰ بلوچستان نا سلاہکار معدنیات و کانڑ کنی حاجی میر محمد خان لہڑی وزیراعظم پاکستان نا دورہ گوادر ئِ بلوچستان نا ترند رفتار شونداری نا رداٹ اہم ئُ پیش رفت اس گوندسا پارینے کہ گوادر نا ہندی بندغ آتا شونداری و اوفتا حق انا رکھ اکن وزیراعظم نا ویژن و پکا عزم روشنا آخبت نا ضامن ئِ۔ داخیال آتا درشانی ئِ او وزیراعظم نا لس الس آن تران آن پد ”اے پی پی“ تون خصوصی ہیت وگپ کرسا کرے۔ حاجی میر محمد خان لہڑی پارے کہ گوادر اٹی وزیراعظم نا تاریخی جلسہ ٹی وزیراعلیٰ بلوچستان نواب ثناءاللہ خان زہری مدلل وڑاٹ بلوچستان والاتا جوزہ و احساس آتا پبی نمائندگی ئِ کرسا بلوچستان نا الس نا توار ئِ مچ آ پاکستان اسکان سرکرے۔ گوادر نا ترند رفتار شونداری پاکستان مسلم لیگ (ن) نا حکومت نا مرہون منت ئِ و ڈغاری حق آک نیک روشن ئُ کہ 1991، 1997 و2013ءآن داوخت اسکان گوادر و بلوچستان ناترند رفتارشونداری نا سہرا مسلم لیگ (ن) نا حکومت ئِ کائک۔ حاجی محمد خان لہڑی پارے کہ بلوچستان اٹی یانزدہ سد کلومیٹر آن زیات وخت آ مبنی روڈ نیٹ ورک نا قیام ننا حکومت نا ہمو تاریخ ساز کارکڑد ئِ ہراڑآن بلوچستان نا ترند رفتار شونداری نا تغ عملی تعبیر اس اختیار کرینے۔ اوپارے کہ گوادر اٹی 300 میگاواٹ بجلی نا پیداواری کارخانہ غاتا فعالیت آن گوادر و ایب وکیب اٹی پسماندگی نا تہاری چٹک و شونداری و شونہالی نا پوسکن آ دور بناءکیک۔ اوپارے کہ وزیراعلیٰ بلوچستان نواب ثناءاللہ خان زہری گوادر نا لس جلسہ ٹی اسہ وار ولدا صفا انگا لوز آتیٹی صفا کرینے کہ گوادر نا رہینگوک آتا حق آ ہچ ئُ سمجھوتہ یا سودہ بازی اس قابل قبول اف ، و ہندی خلقت نا حق انا رکھ صوبائی حکومت نا اولین چکار اٹی ئِ ہراڑکن المی کانود سازی کننگ انگ ئِ۔
