اسلام آباد۔ 04 مارچ (اے پی پی) وزیراعظم عمران خان اینوپنچ شنبے نادےآ 14 می ای سی او سروک کانفرنس اٹی ورچوئلی بشخ ہلیک۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ 13 می ای سی او سروک کانفرنس مارچ 2017ء ٹی اسلام آباد اٹی اڈ ہلکوسس و 13 می سروک کانفرنس پاکستان ءِ چیئرمین گچین کریسس۔ وزیراعظم عمران خان 14 می ای سی او سروک کانفرنس نا بناءِ کیک وخت اس کہ 14 می سروک کانفرنس ترکی نا صدر رجب طیب اردوان نا کماشی ٹی اڈ ہلیک۔ دا سرکڑدہ ئی کانفرنس نا سرحال’’کوویڈ۔ 19 نا رداٹ علاقائی اقتصادی کمکاری‘‘ ءِ۔ کوویڈ۔ 19 نا چیلنج آتا رداٹ پاکستان نا نقطہ نظر ءِ پیش کرسا وزیراعظم واپار و رابطہ نا مون آ دننگ نا ای سی او نا بنداوی اصول آتا رداٹ علاقائی اقتصادی شونداری کن تینا ویژن آن معلومدار کیک۔ پاکستان ایران وترکی تون ای سی او نا بانی باسک آتیٹی اوار ءِ۔ داتنظیم ءِ 1985ء ٹی علاقائی کمکاری شونداری(آر سی ڈی) نا چٹنگ آن پد جوڑ کننگا۔ اوغانستان، آذربائیجان، قازقستان، کرغزستان، تاجکستان، ترکمانستان و ازبکستان اوکان پد ای سی او نا باسک انا وڑاٹ اوار مسر۔ بانی باسک انا حیثیت اٹ پاکستان ای سی او تون سنبرینگوک ءِ ہرانا مسخت مواصلات، واپار، دودوربیدگ و رابطہ غاتیا چکار کننگ تون علاقائی کمکاری ءِ مون آ دننگ ءِ۔ سروک دیوان 10 باسکی ای سی او ملک آتا بڑزکو کہولی پلیٹ فارم ءِ۔ سروک دیوان اٹی ای سی او نا فائدہ نا علاقائی و جہانی باندات آتیا گپ وتران و ای سی او نا پروگرام و ڈٹ آتیا عملدرآمد آ پیش رفت نا جاچ ءِ ہلنگک۔ پاکستان علاقائی اقتصادی رابطہ غاتون اوار ای سی او نا ہدف و مسخت آتا دوئی کننگ کن فعال کڑد ادا کننگ ءِ۔
