اسلام آباد۔ 03 مارچ (اے پی پی) بنجائی وزارت خزانہ یکم مارچ 2021ء آن گریڈ اسٹ آن گریڈ 19 اسکان نا بنجائی ملازم آتا بنداوی تنخواہ تیٹی 25 درسد تخفیف تفاوت الاؤنس نا آفس میمورنڈم جاری کرے۔ وزارت خزانہ نا ریگولیشن ونگ انا کنڈآن جاری دفتری یات داشت نا رداٹ 25 درسد تخفیف تفاوت الاؤنس نا اطلاق ہمو ملازم آتیا مفک ہرامہالو آن ودکی الاؤنس یا بنداوی تنخواہ نا 100 درسد بریبر یا اوکان زیات الاؤنس ہلنگ ءُ، 25 درسد تخفیف تفاوت الاؤنس 2017ء نا بنداوی تنخواہ نا اسکیل نارداٹ مریک۔ یات داشت نا رداٹ الاؤنس نا اطلاق گریڈ اسٹ آن گریڈ 19 اسکان نا غٹ سرکاری ملازم بشمول بنجائی سیکرٹریٹ و محلقہ محکمہ غاتیا مریک۔ یات داشت نا رداٹ 58 ادارہ و محکمہ غاتا ملازم آتیا داالاؤنس نااطلاق مفک انتئے کہ او مہالو آن ودکی الاؤنس یا بنداوی تنخواہ تا بریبر و اوکان زیات الاؤنس ہلنگ ءُ۔ اسہ پین آفس میمورنڈم اسے نا کمک اٹ تخفیف تفاوت الاؤنس نا اطلاق نا بابت ویل آتا ایسری کن ایڈیشنل سیکرٹری ریگولیشنز وزارت خزانہ نا کماشی ٹی کمیٹی اس جوڑ کننگانے۔ کمیٹی نا ایلو باسک آتیٹی جوائنٹ سیکرٹری ریگولیشنز فنانس ڈویژن، ڈپٹی ملٹری اکاؤنٹنٹ جنرل، ایڈیشنل اکاؤنٹنٹ جنرل پاکستان ریونیو و تعلقدار وزارت و ڈویژن آتیٹی جوائنٹ سیکرٹری تا عہدہ نا آفیسر اوار مریک، وخت اس کہ ڈپٹی سیکرٹری (آر آئی) وزارت خزانہ کمیٹی نا سیکرٹری نا فرض ءِ سرایتک۔
