کوئٹہ۔ 03 مارچ (اے پی پی) سینیٹ نا گچین کاری تیٹی بلوچستان نا 12 نشست آتا غیر حتمی و غیر سرکاری نتیجہ غاک بسنو۔ سینیٹ گچین کاری تیٹی بلوچستان اسمبلی ٹی غٹ 65 باسک وونٹ بٹیر۔ بلوچستان آن 7 جنرل نشست آتیا حکومتی الائنس نا 5 و اپوزیشن الائنس نا 3 اومیتدار سرسہب مسنو۔ غیر سرکاری نتیجہ غاتا رداٹ جنرل نشست آتیا سرسہب اومیتدار آتیٹی حکومتی سیوت آن سرفراز احمد بگٹی، منظور احمد کاکڑ، پرنس احمد عمر احمد زئی، ارباب عمر فاروق و محمد عبدالقادر اوار ءُ وخت اس کہ اپوزیشن جماعت آتا جنرل نشست آتیا مولانا عبدالغفور حیدری محمد قاسم رونجھو سینیٹر گچین مسنو۔ بلوچستان اٹی زالبول آتا 2 نشست آتیا ثمینہ ممتاز و نسیمہ احسان سرسہب مسنو۔ ثمینہ ممتاز نا تعلق بی اے پی آن ءِ اودے حکومتی سیوت نا مخ تفی دوئی ئس وخت اس کہ نسیمہ احسان آزاد اومیتدار ئس و اسہ دے مہالو بی این پی ٹی اوار مسوسس، اودے اپوزیشن الائنس نا مخ تفی دوئی ئس۔ ٹیکنو کریٹ آتا 2 نشست آتیا جے یو آئی نا کامران مرتضیٰ ایڈووکیٹ سرسہب مس، اودے اپوزیشن الائنس نا مخ تفی دوئی ئس۔ دافتیان بیدس ٹیکنو کریٹ نانشست آ بے ای پی نا سعید احمد ہاشمی ہم سرسہب مسنے، اودے حکومتی سیوت نامخ تفی دوئی ئس وخت اس کہ اقلیتی نشست آ بلوچستان عوامی پارٹی نا دنیش کمار سرسہب مس۔ حکومت سیوت مخ تف دنیش کمار نا تعلق بی اے پی آن ءِ۔
