اسلام آباد۔ 03 مارچ (اے پی پی) بنجائی وزیر مواصلات مراد سعید پارینے کہ علی گیلانی اپوزیشن نا ایجنڈا ءِ بے نقاب کرینے، علی گیلانی نا ویڈیو آن پیدوار شاہدی رسینگا کہ اپوزیشن پارلیمنٹ نا باسک آتا نہادتننگ نا اودیم ایجنڈا غا متحد ءِ، کانود و مخلوق نا استحصال نا نہاد آ تینا جند انا فائدہ اوفتا اولیت ءِ۔ چارشنبے نادے آ پارلیمنٹ ہاؤس نا پیشن میڈیا تون گپ وتران کرسا اوپارے کہ لیک ویڈیو آن معلوم مریک کہ اپوزیشن غیر کانودی زر جمع کننگ و ہُلی تا واپار اٹ ہرحداسکان ہِننگ کیک۔ اوپارے کہ علی گیلانی نا ویڈیو و اعتراف آن پد یوسف رضاگیلانی تون گچین کاری تیٹی بشخ ہلنگ نا ہچ ءُ سوب اس اف۔ اودے مہالو ہم سپریم کورٹ نابود گوندانے۔ مراد سعید دوبہ خلک کہ یوسف رضاگیلانی ءِ سینیٹ کن داخاطرآن پندار کریر او سپریم کورٹ نا پرمان تے منپرسا سوئس حکومت ءِ چھٹی لکھنگ آن نمن مسوسس و ترک صدر نا اُرائی نا کنڈآن سیلاب زدگان نا امداد کن تروک آ ہار ءِ ہم دُزی کریسس۔ زمی جمب انا خلوک آتا امداد کن فنڈریزنگ مہم اٹی ہالی ووڈاداکارہ انجلینا جولی پاکستان نا دورہ ءِ کرے تو وزیراعظم یوسف رضاگیلانی نا خاہوت ءِ اوڑتون ملنگ کن خصوصی جیٹ جہاز اس ملتان آ گدریفنگا۔ اوپارے کہ عمران خان بطور وزیراعظم ہمیشہ شفافیت ءِ مون آ درے، ملک ءِ سہی کسر آ دننگ نا ہندا اسہ ذریعہ ءِ۔ اوپارے کہ پی پی پی و نواز لیگ گچین کاری و نظام اٹ اسُل شفافیت خواپسہ۔ اوپارے کہ دامسخت کن حکومت ترمیم درست راستی کرفے وسپریم کورٹ تون رجوع کرے۔ پیپلزپارٹی کھلی رائے شماری نا مخالفت ءِ کرینے ہرا داہیت اناشاہدی ءِ کہ او بدعنوان نظام نا مخ تف ءُ۔ بنجائی وزیر پیدوار کرے کہ 2018ء نا سینیٹ نا گچین کاری تیٹی زرہلنگ نا دوبہ پک مننگ آ پی ٹی آئی تینا بیست ایم پی اے ءِ کشاسس۔ سندھ انا شونداری فنڈز پیپلزپارٹی نا کمک اٹ کرپشن کن کاریم اٹ اتنگرہ۔ اواسہ سوج اسے نا ورندی ٹی پارے کہ حکومت ایف اے ٹی ایف نا بابت کانود جوڑ کننگ نا وخت آ بلیک میل کننگ نا حکمت عملی آن پد ہم این آر او تتو۔
