کوئٹہ۔ 03 مارچ (اے پی پی) گورنر بلوچستان امان اللہ خان یاسین زئی سالانہ سبی میلہ 2021ء نا وخت آ تینا اسہ کلہو اسے ٹی پارینے کہ سبی میلہ اسہ تاریخی و روایتی ءُ اہمیت اس تخک۔ داوخت آ نئے بیرہ مچ آ صوبہ غان بلکن ملک انا ایلو علاقہ غاتیان بھلو کچ اسے ٹی مخلوق میلہ ٹی بشخ ہلیرہ۔ ہروارآنبار داسال آ ہم سبی میلہءِ روایتی جوش و جوزہ اٹ اڈتننگ انگءِ۔ اوپارے کہ سبی میلہ کشت وکشار و لائیو اسٹاک نا بشخ آتیٹی کارکڑد نا جاچ ءِ ہلنگ و پوسکن آ عزم اتون دافتے مون آ دننگ کن جوانءُ موقع اس مریک۔ سبی میلہ نا وخت آ ساہدار تا نمائش و ہڷ و بہاکننگ آن بیدس کشاری و صنعتی نمائش ہم اڈتننگک۔ ہندامیلہ نا کمک اٹ مخلوق ءِ گچین سیل و سوات سرجزآتا وارخواہی ہم دوئی مریک۔ گورنر یاسین زئی پارے کہ سبی میلہ صوبہ نا معاشرتی و دودوربیدگی زند انا ڈیک ءِ، اوپارے کہ سبی صوبہ نا تاریخ و تمدن نا وت ءِ، زندہ قومک تینا قومی تہوار تے جوش و جوزہ اٹ اڈایترہ۔ سبی میلہ کشت وکشار و مالداری نا مون آ دننگ اٹ مزل نانشان نا حیثیت تخک۔ اوپارے کہ ملک انا 80 درسد جی ڈی پی نا سیبو مالداری نا بشخ اتون وابستہ ءِ۔ ہنداخاطرآن المی ءِ کہ کشت وکشار و لائیو اسٹاک نا بشخ آتے پوسکن آ وڑوڈول آتیا اتنگے۔ گورنر بلوچستان امان اللہ خان یاسین زئی میر چاکر خان رند یونیورسٹی سبی نا جوڑ کننگ آن پد نئے بیرہ سبی نا بلکن ایلو ایب وکیب علاقہ غاتا طالب علم آتے ہم ہائیر ایجوکیشن نا دوئی کننگ نا آسراتی دوبسنے۔ اوپارے کہ سبی میلہ امن و سلامتی نا کلہو ءِ مچ آ ملک انا الس اسکان سرکننگ نا اہم ءُ ذریعہ اسے۔ گورنر بلوچستان امان اللہ خان یاسین زئی میلہ نا منتظمین آتے سبی میلہ نا شاندار بست وبند کننگ آ مبارکبادی ترسا دانا سرسہبی کن نیک است خواہی نا درشانی ءِ کرے۔
