کوئٹہ۔ 03 مارچ (اے پی پی) قومی احتساب بیورو بلوچستان ریڈ کریسنٹ بلوچستان اٹی کروڑ آ روپئی نا وڈی خوری نا پدرند ءِ خلسا ریڈ کریسٹ بلوچستان نا مسکوہی چیئرمین شبیر احمد و مسکوہی سیکرٹری جہانزیب رئیسانی ءِ بلوچستان ہائی کورٹ آن دزگیری آن مست ضمانت نا درخواست مسترد مننگ آ دزگیر کرینے۔ ترجمان نیب بلوچستان نا رداٹ ڈی جی نیب بلوچستان چیئرمین نیب جسٹس جاوید اقبال نا منظوری آن دوبہ دار آتا برخلاف پبی شاہدی تے مون آ تخسا دزگیری نا وارنٹ جاری کریسس۔ ہراڑآ دوبہ دار آک عدالت تون رجوع کریر تو بلوچستان ہائیکورٹ نا جسٹس کامران ملاخیل و روزی خان کاکڑ نیب انا پراسیکیوٹر نا دلیل و جاست وپاستی آفیسر نا پیش کروک آ کیہی شاہدی تے مون آ تخسا دوبہ دار آتا ضمانت نا درخواست ءِ ردکرے۔ نیب بلوچستان ریڈ کریسنٹ بلوچستان اٹ کروڑ آ روپئی نا نغڑدنگ نا غاوتا نوٹس ءِ ہلسا جاست وپاست نا بناءِ کرے تو پت پاش مس کہ دوبہ دار شبیر احمد، چیئرمین ریڈ کریسنٹ بلوچستان سیکرٹری ریڈکریسنٹ بلوچستان جہانزیب رئیسانی و ایلودوبہ دار آتون اواری اٹ بیدس واکداری تیان گدرینگسا برخلاف ضابطہ و کانود قدرتی آفت آتون مون تننگ و مخلوق نا راجی آسراتی کن جتا فنڈ آتیٹی بھلو کچ اسے آ کرپشن کریر۔ آفس نا زیب و زینت، پیٹرول و تینا ملازم آتا پن آ جوڑ کروک آ رینٹ اے کار سروس تون اوار چندی مد آتیٹی چیک کیش کرفیر۔ نیب بلوچستان ءِ ملوک آ دستاویز آتا رداٹ دوبہ دار آک داہیت انا ورندی ءِ تننگ کتوس کہ کم و ود اسہ کروڑ روپئی نا چیک آتے ہرامد اٹ جاری کننگا۔ یات سلے کہ سیاسی بنداو تیا بھرتی کروک آ دوبہ دار چیئرمین ریڈ کریسنٹ سوسائٹی تون چیئریٹی آرگنائزیشن چلیفنگ نا ہچ ءُ آزموندہ و مہارت اس الوکہ۔ وخت اس کہ سیکرٹری جہانزیب رئیسانی محکمہ تعلیم نا مسکوہی گھوسٹ ملازم ءِ ہراڑآ مستین اٹ ہم وڈی خوری نا دوبہ غاک ئسر۔ نیب بلوچستان دوبہ دار آتے دزگیر کرسا نیب آفس آ گدریفینے و جسمانی ریمانڈ کن عدالت اٹ پیش کننگک مستی جاست وپاست برجاءِ۔
