صدر مملکت نا اولیکو ایروسپیس اینڈ نیشنل سیکورٹی ورکشاپ نا بشخ ہلوک آتیٹی سرٹیفکیٹ بشخنگ نا دود آن تران

اسلام آباد۔ 02 مارچ (اے پی پی) صدر مملکت ڈاکٹر عارف علوی پارینے کہ ننے دشمن نا روایتی و ہائبرڈ جلہو آتا توڑ اس کننگ کن سلہہ بند فوج انا کسبی تیاری تتون اوار اوار ہائبرڈ جنگی حکمت عملی اس وضع کروئی مریک، راج انا غٹ تپہ غاتے بریبر وارخواہی فراوان کروئی مریک۔ داخیال آتا درشانی ءِ او پاکستان ایئر پورٹ ہیڈکوارٹرز(پی اے ایف) اٹ اولیکو ایروسپیس اینڈ نیشنل سیکورٹی ورکشاپ ایرون2021ء ٹی بشخ ہلوک آتیٹی سرٹیفکیٹ بشخنگ نا دود آن تران کرسا کرے۔ کانفرنس اٹ پارلیمنٹ نا باسک، سرکاری ملازم و صحافی تتون اوار 36 بندغ بشخ ہلکر۔ 22 فروری آن 2 مارچ اسکان برجاسلوک آ کانفرنس اٹ ملک ءِ مون تروک چیلنج، اسٹریٹجک وتواجہی و زرگزرانی خودکفالت آ چکار کننگا۔ صدر مملکت ڈاکٹر عارف علوی دود آن تران کرسا پارے کہ ملک اٹی اولیکو وار ایروسپیس ورکشاپ نااڈتننگ آ مبارکبادی ایتیوہ ، ورکشاپ اٹ آخبت نا چیلنج آتیا قومی مذاکرہ مس۔ اوپارے کہ قوم ہموتم آ جوڑ مریک ہراتم راج انا ہرتپہ نا ویل ایسر مرے، ننے دشمن تا روایتی جلہو آتون ہائبرڈ جلہو آتا ہم توڑ اس کروئی مریک۔ اوپارے کہ جہانی سیاست و پالیسی تیٹی پدریسہ بدلی مننگ ءِ، قومی سلامتی نا چیلنج آتون مون تننگ کن جہانی کہول آ بدل مروک حالیت آتا رداٹ پوسکن آ وڑوڈول آتیا مبنی حکمت عملی اس اختیار کننگ اہم ءِ۔ اوپارے کہ انفارمیشن نیٹ ورک نا بابت ڈیجیٹل جلہو و دین بمب آتا کاریم اٹ اتنگ نا گڑتی تیٹی ودکی مسنے، گوگل و فیس بک کون آ کمپنی تتون اوار انٹیلکچوئل طاقت ملک، اقوام متحدہ و دنیا نا پارلیمنٹ آتیا اثرانداز مننگ ءِ، سوشل میڈیا نا دروشم اٹ السی سلاہ غا اثرانداز مننگ ءِ، سوشل میڈیا نا منفی اثرآتے کنٹرول کننگ کن انفرادی کہول آ کوشست کروئی مریک، جہانی سیاسی حالیت و پالیسیک ترندی اٹ بدل مرسا کیرہ۔ اوپارے کہ پوسکن آ سیکورٹی سیوت نا رداٹ جہانی منظرنامہ ہر لمحہ بدل مننگ ءِ، ننے بدل مروک جہانی حالیت آتا رداٹ تینے تیار کروئی مریک۔ اوپارے کہ پاکستان نا سلہہ بند فوج ملکی سیم تا دفاع کن پورو تیار ءِ، دشمن تا ناپاک عزم ءِ بے سہب کینہ۔ اوپارے کہ پاکستان بھاز قربانی ترسا دہشت گردی نا برخلاف سرسہبی دوئی کرے۔ پاکستان دہشت گردی نا برخلاف جنگ اٹ نرزور قوم انا وڑاٹ مون آ بسنے۔ صدر مملکت پاک فضائیہ نا تیاری تا ستاءِ کرے ہراکہ ملکی سیمی فضائی دنگ انا رکھ اکن وخت اس ہم پدی سلتنو۔ اوپارے کہ 2019ء ٹی پاک فضائیہ بالاکوٹ آ دشمن نا جلہو نا پبی ورندی ءِ تس۔ صدر عارف علوی قومی شاعر علامہ محمد اقبال نا شئیر تا حوالہ ءِ ترسا پارے کہ قوم خودانحصاری آ عمل کرسا دشمن نا ناپاک عزم ءِ بے سہب کننگ کن پورو وڑاٹ تیار ءِ۔ اوپارے کہ ننے جاپان کون آ شون ہلوک ملک آتیان شونداری نا گُر ءِ ہیل کروئی مریک، سرسید احمد خان برصغیر نا مسلمان تے تعلیم نا اہمیت آن روشناس کرفے۔ کمانڈر ایئر وار کالج انسٹی ٹیوٹ ایئر وائس مارشل ذوالفقار قریشی پارے کہ پاک فضائیہ قومی سلامتی ءِ مون تروک روایتی و غیر روایتی چیلنج آتون مون تننگ کن تیار ءِ۔ اوپارے کہ زرگزرانی سوگوی و سوگو صنعتی بنداو تون اوار قومی کوشست آتیان فضائی قوت نا لائخی ءِ دوئی کننگ مریک۔ صدر ڈاکٹر عارف علوی ورکشاپ نا بشخ ہلوک آتیٹی سرٹیفکیٹ بشخا۔ پاک فضائیہ نا سروک ایئرچیف مارشل مجاہد انور خان صدر مملکت ڈاکٹر عارف علوی ءِ شیلڈ اس پیش کرے۔