الیکشن کمیشن سینیٹ گیچن کاری تے آجو، منصفانہ، بے کنڈہلوک و شفاف کننگ کن چاروکی کمیٹی اس جوڑ کرے

اسلام آباد۔ 02 مارچ (اے پی پی) الیکشن کمیشن سینیٹ گچین کاری تے آجو، منصفانہ، بے کنڈہلوک و شفاف کننگ کن چندی ادارہ غاتیا تالان چاروکی کمیٹی اس جوڑ کرینے وخت اس کہ کمپلینٹ مینجمنٹ سسٹم و خاص ءُ مانیٹرنگ سیل اس ہم جوڑ کرینے۔ الیکشن کمیشن نا کنڈآن جاری پریس ریلیز نا رداٹ آئین نا آرٹیکل 218(3) نا رداٹ سینیٹ گچین کاری تے آجو و شفاف کننگ کن الیکشن کمیشن، ایف بی آر، نیب، اسٹیٹ بینک آف پاکستان و نادرا نا نمائندہ غاتیا تالان چاروکی کمیٹی اس جوڑ کننگانے ہرا الیکشن کمیشن ءِ چندی حکومتی ادارہ غاتا کنڈآن المی معلومداری و ریکارڈ نا فراوانی و ہراڑے المی مرے جاست وپاست کننگ آن پد تینا رپورٹ ءِ پیش کننگ نا پابند ءِ تانکہ ہروڑنا گچین کاری وڈی خوری نا تدارک ءِ کننگ مرے۔ داکان بیدس کمپلینٹ مینجمنٹ سسٹم اس جوڑ کننگا تانکہ الس الیکشن کمیشن ءِ تینا غاو تے ویب سائٹ آ آن لائن مون ایتنگ کے۔ الیکشن کمیشن سیکرٹریٹ اٹ خصوصی مانیٹرنگ سیل اس ہم جوڑ کرینے تانکہ الیکشن ایکٹ 2017ء نا دفعہ 167 نا رداٹ تروک آ کرپٹ پریکٹس ءِ توننگ مرے۔ دا سیل 24 گھنٹہ کاریم کننگ ءِ۔ داکان بیدس الس سینیٹ الیکشن 2021 نا بابت غاوتے الیکشن کمیشن سیکرٹریٹ ءِ فون نمبر 051-9204402-03و صوبائی دفترآتا رابطہ نمبر آ گدریفنگ کیرہ۔