اسلام آباد۔ 02 مارچ (اے پی پی) وزیر داخلہ شیخ رشید احمد پارینے کہ اوغانستان اٹی پائیدار امن پاکستان و امریکہ نا اسیجائی مسخت ءِ، ڈینیل پرل کیس اٹ عمرشیخ نا رہائی نا برخلاف اپیل سپریم کورٹ اٹی ءِ، عدالت آک آجوءُ، یخین ءِ کہ بڑزکو عدلیہ نا فیصلہ انصاف و کانود نا رداٹ مریک، اومیت ءِ پوسکن آ امریکی انتظامیہ آن پاک امریکہ تعلقداری ٹی نمان گچینی بریک۔ اوداخیال آتا درشانی ءِ سے شنبے نادے آ داڑے امریکہ نا قائم مقام سفیر انجیلاپی ایگلر تون اوڑدہی ٹی گپ وتران کرسا کرے۔ اوڑدہی ٹی پاکستان امریکہ تعلقداری، پوسکن آ امریکی انتظامیہ و اوغانستان اٹی پائیدار امن، امریکی صحافی ڈینیل پرل کیس اٹی اوار دوبہ دار آتا بابت بڑزکو عدلیہ ٹی اپیل و تین پہ تینی است خواہی نا ایلو باندات آ گپ وتران کننگا۔ وزیر داخلہ پارے کہ پاکستان و امریکہ نا نیام اٹ تعلقداریک بھاز متکن ءُ، اومیتءِ پوسکن آ امریکی انتظامیہ تون پاک امریکہ تعلقداری تیٹی نمان گچینی بریک، اوپارے کہ اوغانستان اٹی پائیدار امن پاکستان و امریکہ نا اسیجائی مسخت ءِ، پاکستان اوغانستان اٹی امن کن بے پناہ جانی و مالی قربانی تسنے۔ اوغانستان اٹی پائیدار امن کن پوسکن آ امریکی انتظامیہ تون پبی کمکاری ءِ برجاتخک۔ اوپارے کہ ڈینیل پرل کیس اٹی عمرشیخ نارہائی نا برخلاف اپیل سپریم کورٹ اٹی ءِ۔ پاکستان اٹی عدالت آک آجوءُ۔ یخین ءِ کہ بڑزکو عدلیہ نا فیصلہ انصاف و کانود نا رداٹ مریک۔ قائم مقام امریکی سفیر پارے کہ پوسکن آامریکی انتظامیہ تون پاک۔ امریکہ تعلقداری تیٹی گچینی کن بے پناہ وارخواہی ارے، اوغانستان پائیدار امن کن پاکستان نا کوشست آتے قدر انا نظراٹ ہرک۔ قائم مقام امریکی سفیر پارے کہ امریکی شاری و صحافی ڈینیل پرل نا کیس اٹی پاکستانی عدالت آن انصاف نااومیت ءِ۔ ڈینیل پرل نا خاہوت انصاف نا چاری ءُ۔ داوخت آ قائم مقام امریکی سفیر پاکستان نا کورونا دین ءِ کنٹرول کننگ نا گام گیج آتا ہم ستاءِ کرے۔ اوڑدہی ٹی بنجائی سیکرٹری داخلہ یوسف نسیم کھوکھر ہم ساڑی ئسک۔
