اسلام آباد۔ 02 مارچ (اے پی پی) بنجائی وزیرتعلیم و کسبی تربیت شفقت محمود پارینے کہ غیر مسلم اقلیتی طالب علم آتے اسلامیات نا جاگہ غا اوفتا تینا مذہبی قدر ءِ خوانفنگک۔ سے شنبے نادے آ جاری بیان نا رداٹ برطانوی ہائی کمشنر ڈاکٹر کرسچین ٹرنر تون اوڑدہی ٹی بنجائی وزیر شفقت محمود پارے کہ مسیحی، ہندو، سکھ، بہائی مت و کیلاش کمیونٹی کن جتا سرحال ہراکہ دا مذہب آتا سرکڑدہ و اسکالرآتا سلابت و کمک اٹ تیار کننگانے، خوانفنگک۔ بنجائی وزیر اسہ وڑ تعلیمی نصاب آ گپ وتران کرسا پارے کہ پنچ می گریڈ اسکان انگلش، ریاضی و سائنس، انگریزی ٹی وخت اس کہ اردو و اسلامیات اردوٹی خوانفنگرہ۔ سوشل سٹڈیز و جنرل نالج اردو ٹی وخت اس کہ انگلش نا اصطلاک ہم دا سرحال آتیٹی اوار مریرہ۔ ولے شش آن ہشت کلاس اسکان انگلش جزوآتا پدریسہ ودکی ءِ کننگک۔ و ہشت آن پد طالب علم آک تینا مرضی اٹ انٹرنیشنل کوالیفیکیشن یا نیشنل کوالیفیکیشن ءِ گچین کننگ کیرہ۔ بنجائی وزیر تعلیم شفقت محمود پارے کہ پرائیویٹ پبلشر آتے کتاب آتا شینک انا موکل تننگانے و صوبہ و نجی تعلیمی ادارہ غاہرکتاب ءِ خوانفنگ کیرہ، ولے بنجائی وزارت تعلیم دا رداٹ اِراہیت ءِ پک کرینے اولیکو داکہ پرائیویٹ پبلشرآتا کتاب’’اسہ وڑ تعلیمی نصاب‘‘ اٹ ہم آہنگ مریرو ارٹ میکو داکہ ہرتپہ فکر انا جوزہ و احساس آتے مجروح کروک آ یا ہروڑنا خار انگیز مواد کتاب اٹ اوار کننگپ۔ بنجائی وزیر شفقت محمود پارے کہ اسہ وڑ تعلیمی نصاب آ سلاہ تننگ غٹ انا حق ءِ ہنداخاطرآن غٹ آن مست دادے وزارت تعلیم نا ویب سائٹ آ تخنگا۔ اوپارے کہ کیہی مبصر اسہ وڑ نصاب ءِ خواننگ آن بیدس، و اونا جامعیت و افادیت نا مطالعہ ءِ کننگ آن بیدس اوڑآ تنقید ہم کریر۔ بنجائی وزیر پارے کہ چونکہ جمہوریت اٹ پورو امنائی سلاہ دوئی کننگ سرسہب مریک۔ بنجائی وزیر تعلیم ہشت اسکان اسہ وڑ تعلیمی نصاب نا بابت گپ وتران کرسا مستی پارے کہ صوبہ و نجی تعلیمی ادارہ غاتے ودکی مواد خوانفنگ نا موکل تننگانے،ایلیٹ پرائیویٹ اسکولز سازوزیمل و ڈانس انا کلاس تننگ اٹ آجو ءُ ہنداوڑ مدرسہ غاک ہم تینا خوان نظامی نا ودکی مواد خوانفنگ کیرہ۔ مدرسہ غاتا رجسٹریشن آ تین پہ تین گپ وتران کرسا بنجائی وزیرتعلیم شفقت محمود پارے کہ مچ آ ملک اٹی مدرسہ غاتا رجسٹریشن نا چرجوئی برجاءِ و بنجائی وزارت تعلیم نا ذیلی ادارہ ڈائریکٹوریٹ جنرل آف ریلیجیئس ایجوکیشن نا رداٹ شانزدہ دفتر دا مسخت کن جوڑ کننگانے و داوخت اسکان اِرا ہزار مدرسہ رجسٹرمسنو۔ گڑاس مدرسہ غاتا کنڈآن پوسکن آ تعلیمی بورڈز جوڑ کننگ نا خواست ئس تو پنچ پوسکن ءُ بورڈز ہم جوڑ کننگانے۔ بنجائی وزیر تعلیم پارے کہ مدرسہ غاتا کاریم تعلیم تننگ ئس ولے اوفتا باندات آتے ننے آن مست وزارت داخلہ ہُراکہ نن اوفتے بنجائی وزارت تعلیم و کسبی تربیت نا ماتحت ایسونن و ہراڑے مدرسہ غاتا طالب علم آتیکن اسہ وڑ تعلیمی نصاب نا اطلاق آن گچین کیریئر نا دورہ غاک ملنگار ہموڑے داہم پک کننگ اُن کہ اسہ مدرسہ اسے ٹی ہم اشتعال انگیز یا خار آ مبنی لٹریچر خوانفنگپ و ارٹ میکو داکہ سیاسی لیڈر اس تینا سیاسی مسخت کن مدرسہ غاتا طالب علم آتے کاریم اٹ اتنگ کپ۔
