اسلام آباد۔ 02 مارچ (اے پی پی) متحدہ قومی موومنٹ، مسلم لیگ (ق)، بلوچستان عوامی پارٹی و جی ڈی اے نا سرکڑدہ غاک سینیٹ کن پی ٹی آئی نا اومیتدار ڈاکٹر عبدالحفیظ شیخ نا پورو مخ تفی نا پڑو ءِ کرینو، غٹ سیوتی جماعت آک ڈاکٹر عبدالحفیظ شیخ ءِ وونٹ ایترہ، سیوتی جماعت آک حکومت جوڑ کننگ، سینیٹ نا گچین کاری تتون اوار ہر قومی فائدہ نا باندات اٹی وزیراعظم عمران خان و اونا ٹیم اتون سلوک ءُوخت اس کہ بنجائی خزانہ عبدالحفیظ شیخ پارے کہ مچ آ قوم سینیٹ نا گچین کاری تیٹی وونٹ انا نہاد تننگ نا کسر ءِ بند کننگ و ایماندار سرکڑدہ غاتون سلوک ءِ، نن خوانہ کہ جمہوری عمل نا چرجوئی ٹی ایوان بالا نا گچین کاریک جوان وڑاٹ پورو مریر، غٹ داڑآ گمر کیر۔ دوشنبے نادے آ بنجائی وزیر دفاعی پیدوار گودی زبیدہ جلال نا ہنکین آ سیوتی جماعت آتا راہشون تتون اوار میڈیا تون گپ وتران کرسا پارے کہ پاکستان تحریک انصاف نا سرکڑدہ، متحدہ قومی موومنٹ، مسلم لیگ (ق)، بلوچستان عوامی پارٹی و جی ڈی اے نا سرکڑدہ غاتا منت واری ءِ ہرفیوہ کہ ہرافک سلابت آن پد اسہ وار ولدا داسیوت نا سرسہبی کن تینا سیوت نا پڑو ءِ کرینو۔ اوپارے کہ مسہ مارچ آ نن غٹ اواری اٹ پاکستان نا ایوان بالا ٹی گیشتری دوئی کینہ۔ اوپارے کہ نن خوانہ کہ سینیٹ نا گچین کاری تیٹی نہاد تننگ ءِ بند و سیاست اٹ گالم گلوچ مف و الیکٹورل کالج اٹ پارلیمنٹ نا باسک آک تینا پارٹی والس نا است خواہی تے پورو کیر۔ اوپارے کہ نن کوشست کینہ کہ پاکستان نا الس نا اومیت آتے پورو کین۔ پاکستان نا زرگزران نا سوگوی نا بھرم تےہر الس اسکان سرکین۔ ننا سرکڑدہ و کابینہ تینا قابلیت، و اہلیت و ایمانداری نا سوب آن مچ آ دنیا ٹی تینا پنءِ ودی کرینو۔ داوخت آ متحدہ قومی موومنٹ نا راہشون بنجائی وزیر امین الحق پارے کہ ایم کیو ایم حکومت نا بھلا سیوتی جماعت ءِ، 22 اگست 2016ء آن پد ایم کیو ایم اسہ مون آ بروک ءُ جماعت اسے ہرا ہر باندات آ پارٹی نا تہٹی سلابت اٹ مون آ کاہک، اِرادے مست ایم کیو ایم نا مرکز بہادر آباد اٹ پیپلزپارٹی نا ڈل ہم بسنے، اوفتے اِرغ کنفین ولے ننا اینو ہم ہمو موقف ءِ کہ ایم کیو ایم بنجائی حکومت تون ہم کوپہ سلوک ءِ۔ جی ڈی اے نا راہشون و بنجائی وزیر ڈاکٹر فہمیدہ مرزا پارے کہ جی ڈی اے حکومت نا سیوتی ءِ، حکومت جوڑ مننگ آن ہلیس ہر فیصلہ ٹی اوار سلوک ءِ۔ اوپارے کہ سینیٹ گچین کاری اہمیت تخک، کانود سازی یا پالیسی اس ہمووخت اسکان پورو مفک ہراتم قومی اسمبلی آن پد سینیٹ آن پاس مفک۔ ہراتم سینیٹ اٹ کانود سازی مننگ کپک تو ولدا آرڈیننس بریک۔ اوپارے کہ آئین نا رداٹ متناسب نمائندگی سینیٹ اٹ بایدے مرے، کرپشن نا کسر ءِ بند کروئی ءِ تو متناسب نمائندگی المی ءِ۔ بلوچستان عوامی پارٹی نا راہشون خالد مگسی پارے کہ گڑاس مخلوق نا سوب آن مچ آ نظام ءِ خراب پاننگپ، 22 کروڑ الس نا نمائندہ غاک دُز مننگ کپسہ۔ مسلم لیگ (ق) نا راہشون بنجائی وزیر چوہدری بشیر چیمہ پارے کہ اینو غٹ سیوتی جماعت آتا اہم ءُ دیوان اس مسنے، غٹ سیوتی جماعت آک فیصلہ کرینو کہ پی ٹی آئی نا اومیتدار ڈاکٹر عبدالحفیظ شیخ ءِ وونٹ ایتنہ، انشاء اللہ ڈاکٹر عبدالحفیظ شیخ سرسہب مریک۔ اسہ سوج اسے نا ورندی ٹی عبدالحفیظ شیخ پارے کہ کنا خاہوت 70 سال آن سیاست و پبلک سروس اٹی ءِ، کنا پیرہ وزیراعلیٰ، تحریک پاکستان اٹ کنا پیرہ قائداعظم تون اوار ئس، ذوالفقار علی بھٹو تون کنا باوہ سیاست اٹ ئس، اللہ کنے مسہ وار سرسہبی تسنے۔
