سپریم کورٹ نا فیصلہ غا ہروڑاٹ عمل کننگک، سینیٹ نا گچین کاریک متکن آ وڑوڈول انا رداٹ اودیم بیلٹ انا کمک اٹ مریرہ، الیکشن کمیشن

اسلام آباد۔ 02 مارچ (اے پی پی) الیکشن کمیشن سینیٹ نا گچین کاری تا بابت فیصلہ کرینے کہ سپریم کورٹ نا فیصلہ غا ہروڑاٹ عمل کننگک، سینیٹ نا گچین کاریک متکن آ وڑوڈول انا رداٹ اودیم بیلٹ انا کمک اٹ مریرہ، ٹیکنالوجی نا کاریم اٹ اتنگ کن مسہ باسکی کمیٹی اس ٹہیفنگانے ہراچار ہفتہ غاتیٹی رپورٹ ایتک۔ سے شنبے نادے آ چیف الیکشن کمشنر سکندر سلطان راجہ نا کماشی ٹی دیوان نا اعلامیہ ءِ جاری کننگا، وخت انا کمتی نا سوب آن آئین و کانود نا رداٹ گچین کاری تے کرفنگک، الیکشن کمیشن مستین نا وڑوڈول انا رداٹ گچین کاری تے اڈ ایتک، الیکشن کمیشن سپریم کورٹ نا سلاہ غا ہروڑاٹ عمل کننگ نا فیصلہ ءِ ہم کرینے۔ الیکشن کمیشن سینیٹ نا گچین کاری تے شفاف کننگ کن غٹ گام گیج آتے کیک، الیکشن کمیشن ءِ سپریم کورٹ نا سرجم فیصلہ رسینگتنے۔ سپریم کورٹ گوندانے کہ سینیٹ نا گچین کاریک آئین نا رداٹ اودیم بیلٹ اٹ مریرہ، الیکشن کمیشن گچین کاری تے منصفانہ و شفاف جوڑ کننگ کن میکنزم اس ہم جوڑ کیک، ٹیکنالوجی نا کاریم اٹ اتنگ کن مسہ باسکی کمیٹی اس ٹہیفنگانے، اونا سروک اسپیشل سیکرٹری کنونیئر، ڈائریکٹر جنرل آئی ٹی وسعید گل ج پی ای سی پنجاب باسک مریرہ۔ اسپیشل سیکرٹری نا کماشی ٹی مسہ باسکی کمیٹی چار ہفتہ ٹی رپورٹ ایتک، کمیٹی ءِ نادرا و ایلو ادارہ غاتسکان رسینگ دوئی مریک۔