کوئٹہ۔ 02 مارچ(اے پی پی) صوبائی وزیر داخلہ میر ضیاء اللہ لانگو پارینے کہ داخلی کسر تا سیکورٹی نا جاچ ءِ ہلنگک، و ریڈزون نا سیکورٹی ٹی ودکی نا بابت حکمت عملی اس پک کننگا، سینیٹ گچین کاری غٹ اسمبلی نا باسک آتا رکھ اکن ہروڑگام گیج کننگک، داخلی و خارجی کسر تا سیکورٹی ءِ پین سخت کننگے۔ داخیال آتا درشانی ءِ او سے شنبے نادے آ امن و ایمنی نا جم حالیت آتا بابت بڑزکو کہولی دیوان نا کماشی ءِ کرسا کرے۔ دیوان اٹی بڑزکو عسکری و سول سرکڑدہ غاک بشخ ہلکر۔ دیوان اٹی امن و ایمنی و سینیٹ گچین کاری تا وخت آ سیکورٹی رکھی گام گیج آتا بابت چندی امور نا جاچ ءِ ہلنگا، بشخ ہلوک آک امن و ایمنی نا جم حالیت آتیا است جمی نا درشانی ءِ کریر وخت اس کہ امن وایمنی نا حالیت آتے برقرار تخنگ و پین گچین نا چندی سلاہ تیا ہم سجفنگا۔ دیوان اٹی ایڈیشنل چیف سیکرٹری داخلہ حافظ عبدالباسط، اے آئی جی آپریشن پرویز خان، لیفٹیننٹ کرنل ثاقب، کیپٹن ریٹائرڈ اصغر مشرف، ایس ایس پی انویسٹی گیشن اسد خان ناصر، ایڈیشنل ڈپٹی کمشنر کوئٹہ ثاقب کاکڑ، سی ٹی ڈی آن خالد باقی و ایلو تعلقدار کمامدارآک بشخ ہلکر۔ دیوان اٹی صوبائی وزیر داخلہ میر ضیاء اللہ لانگو امن و ایمنی نا بابت صوبہ نا انتظامیہ و کانود نافذ کروک آ ادارہ غاتا کارکڑد انا ستاءِ کرسا پارے کہ اوصوبہ ٹی امن و ایمنی نا حالیت آتیٹی فرنٹ لائن نا کڑد ءِ ادا کریر و امن و ایمنی کن نن بھلو قربانی تسونن۔ اومستی پارے کہ اسہ دشمن اسے ہم ملک انا امن وایمنی ءِ خراب کننگ نا موکل تفنہ۔
