اسلام آباد۔ 01 مارچ (اے پی پی) اسپیکر قومی اسمبلی اسد قیصر پارینے کہ پنجاب اٹی سینیٹ نا اومیتدار آتا بے مقابلہ غان گچین مننگ ستاکڑزک، بنجائی حکومت سینیٹ نا گچین کاری تیٹی شفافیت آ یخین تخک، صوبہ پنجاب آنبار ایلو صوبہ غاتیٹی ہم سینیٹ نا گچین کاری تیٹی عددی تناسب نا بنداو آ اومیتدار آتا چناؤ شفافیت نا کنڈآ مثبت ءُ پیش رفت اس مریک۔ دوشنبے نادے آ قومی اسمبلی سیکرٹریٹ آن جاری بیان نا رداٹ داخیال آتا درشانی ءِ او گورنر پنجاب چوہدری محمد سرور و وزیراعلیٰ پنجاب سردار عثمان بزدار تون گپ وتران کرسا کرے ہرافک اوڑتون دوشنبے نادے آ اوڑدہی کریر۔ اوڑدہی ٹی ملک انا جم سیاسی و زرگزرانی ھالیت آتیا سرجم گپ وتران کننگا۔ اوڑدہی ٹی اسپیکر قومی اسمبلی پارے کہ پنجاب اٹ سینیٹ نا اومیتدار آتا بے مقابلہ غان گچینی ستاکڑزک۔ بنجائی حکومت سینیٹ نا گچین کاری تیٹی شفافیت آ یخین تخک۔ اوپارے کہ صوبہ پنجاب آنبار ایلو صوبہ غاتیٹی ہم سینیٹ نا گچین کاری تیٹی عددی تناسب نا بنداو آ اومیتدار آتا چناؤ شفافیت نا کنڈآ مثبت ءُ پیش رفت اس مریک۔ اوپارے کہ مستین اٹ مروک آ سینیٹ نا گچین کاری تا شفافیت آ سوج ہرفنگسا کرینے۔ غٹ جماعت آتا عددی تناسب اٹ سینیٹ اٹی سیٹ ہلنگ اوفتا جمہوری حق ءِ۔ اسپیکر اسد قیصر پارے کہ سینیٹ نا گچین کاری تیٹی شفافیت اتنگ کن غٹ سیاسی جماعت و الیکشن کمیشن تینا کڑد ءِ ادا کیر۔ ملک ءِ مون تروک ویل آتیان کشنگ کن غٹ سیاسی واکدار تا نیام اٹ کمکاری نا خواہندار اُن۔ ملک تاریخی زرگزرانی تنکی تون مون تروک ئس ہرانا ساڑی حکومت مون ءِ تورینے۔ ملک انا زرگزرانی ٹک آک پاش کیرہ کہ ملکی زرگزران شونداری نا کنڈآ ہِننگ ءِ۔ اسد قیصر پارے کہ ملک اٹ سیاسی انتشار شونداری نا کسر اٹ بھلو اڑاند اسے۔ داوخت آ گورنر پنجاب چوہدری محمد سرور پارے کہ پنجاب اٹ سینیٹ نا اومیتدار آتا بے مقابلہ غان گچینی سیاسی بالغ نظری نا درشانیءِ۔ مستین اٹ سینیٹ نا گچین کاری تیا ہور ہرفنگ جمہوری عمل نا نزوری ءِ۔ اوپارے کہ اومیت ءِ کہ آخبت ہم اپوزیشن تینا اختلاف آتے اسہ کنڈ تخسا ملکی فائدہ ٹی کمک کیک۔ اوڑدہی ٹی وزیراعلیٰ پنجاب عثمان بزدار پارے کہ صوبہ پنجاب اٹی غٹ سیاسی واکدار آتے اوار دننگ نا خواہندار اُن۔ صوبہ پنجاب شونداری نا کنڈآ ہِننگ ءِ۔ اوپارے کہ وزیراعظم نا وژن نا رداٹ السی آسودہی و روزگار نا وارخواہی ودی کننگ کن شونداری ڈٹ آتیا کاریم برجاءِ۔ پنجاب اٹی صنعتی شونداری کن خصوصی زون تا جوڑ کننگ آ کاریم برجاءِ۔
