اسلام آباد۔ 01 مارچ (اے پی پی) پاکستان اینخو سال 5 جون آ ماحولیات نا جہانی دے انا میزبانی ءِ کیک، دا شرف پاکستان نا اسہ پدتموک ملک اس مننگ آن پد ہم ماحولیات نا رکھ و مون آ دننگ کن قائدانہ کڑد انا جہانی کہول آ اعتراف ءِ۔ دانا مسخت ایکوسسٹم و حیاتیاتی تنوع نا رکھ انا بابت ہندی و جہانی کہول آ آگاہی ءِ مون آدننگ ءِ تانکہ موسمیاتی بدلی تا منفی زہم تتون مون تننگ کن اسیجائی وڑاٹ گام گیج کننگ مرے۔ داہیت انا پڑو ءِ وزیراعظم نا خصوصی کمکارموسمیاتی بدلی ملک امین اسلم و اقوام متحدہ نا پروگرام ماحولیات(یواین ای پی) نا ایگزیکٹو ڈائریکٹر اینگراینڈرسین دوشنبے نادے آ داڑے اسیجائی پریس بریفنگ اٹ کرے۔ جہانی یوم ماحولیات نا وخت آ اقوام متحدہ نا کنڈآن عشرہ بحالی ایکوسسٹم 2021 آن 2030 آ بناءِ ہم کننگک۔ ملک امین اسلم پارے کہ جہانی یوم ماحولیات نا میزبانی پاکستان کن شرف اسے، دا موقع ءِ تننگ آ نن اقوام متحدہ نا پروگرام ماحولیات نا منت وار اُن۔ اوپارے کہ ایکوسسٹم نا بحالی نا عشرہ ءِ اڈتننگ نا فیصلہ تدوک آ سال کننگا۔ اوپارے کہ کورونا دین اٹی داہیت انا درک ودی مس کہ ایکو سسٹم نا بحالی اخس المی ءِ۔ داڑآن ننے معلوم مس کہ قدرت نا گڑاس حدود و معیارات ءُ ہرافتیان تجاوزنا بھرم ءِ کنوئی تمک۔ دابابت کورونا دین ننکن اسہ پیدوار ءُ درور اسے۔ اوپارے کہ پاکستان ماحولیاتی انحطاط و داٹی مروک آ نسخان آتون مون تننگ کن دنیا ءِ یکجا کننگ نا مہم نا وت مریک۔ ملک امین اسلم پارے کہ اینخو سال ماحولیات نا بابت بھاز اہم مریک، داٹی مسہ جہانی کانفرنس و جہانی یوم ماحولیات نا دود ہم مریک۔ اوپارے کہ پاکستان وزیراعظم عمران خان نا وژن نا رداٹ گرین فیوچرنا کنڈآن ہِننگ ءِ و ایکو سسٹم نا بحالی و ماحولیاتی رکھ اکن قدرتی طریقہ ہائے کار ءِ تینا کننگ ءِ۔ امین اسلم پارے کہ پاکستان ماحولیات نا بابت اسہ پوسکن ءُ فنانشل فریم ورک اسے نا تیاری آ ہم کاریم کننگ ءِ۔ دا چرجوئی ٹی 500 یورومالیت نا اولیکو گرین بانڈ جاری کننگک ہراڑآن ایکو سسٹم نا رکھ و مون آ دننگ کن مالی وسیلہ دوئی مننگ کیک۔
