سپریم کورٹ تینا سلاہ  ٹی گوندانے کہ سیکریسی مدامی کن  اف، سینیٹر فیصل جاوید

اسلام آباد۔ 01 مارچ (اے پی پی) پاکستان تحریک انصاف نا راہشون سینیٹر فیصل جاوید پارینے کہ سینیٹ نا گچین کاری تے اوپن بیلٹ انا کمک اٹ کرفنگ نا بابت صدارتی ریفرنس آ عدالت عظمیٰ تینا سلاہ ءِ تسنے، سپریم کورٹ تینا سلاہ  ٹی گوندانے کہ سیکریسی مدامی کن اف، وونٹ انا شناخت مننگ کیک، گچین کاری تیٹی شفافیت کن بیلٹ انا سیکریسی مدامی مفننگ نا بابت عدالتی سلاہ زبردست ءِ، اینو وزیراعظم عمران خان کٹانے، وونٹ انا شناخت وزیراعظم عمران خان نا جیت ءِ۔ داہیت ءِ او دوشنبے نادے آ داڑے سپریم کورٹ نا پیشن صحافی تتون گپ وتران اٹی پارے۔ سینیٹر فیصل جاوید پارے کہ مستین اٹ سینیٹ نا گچین کاری تیٹی کرپشن مسکہ، شفافیت کن وزیراعظم عمران خان صاحب سینیٹ گچین کاری تے اوپن بیلٹ انا کمک اٹ کرفنگ نا خواہندار ءِ، وزیراعظم عمران خان شفافیت کن بھلو جہد اس کرینے۔ وزیراعظم عمران خان شفافیت و کرپشن ءِ چٹفنگ خواہک، وزیراعظم عمران خان ہرکہول آ شفافیت خواہک۔ اوپارے کہ سپریم کورٹ تینا سلاہ ٹی الیکشن کمیشن ءِ پارینے کہ کرپٹ پریکٹس ءِ توننگ الیکشن کمیشن نا زمواری ءِ، کرپشن ءِ توننگ و گچین کاری تیٹی شفافیت کن الیکشن کمیشن غٹ گام گیج کرے۔ اسہ سوج اسے نا ورندی ٹی اوپارے کہ پاکستان تحریک انصاف نا حفیظ شیخ سینیٹ نا گچین کاری تے کٹک و باتننگ پی ڈی ایم نا اومیتدار سید یوسف رضاگیلانی نا مقدر ءِ۔