اسلام آباد۔ 01 مارچ (اے پی پی) سپریم کورٹ آف پاکستان سینیٹ نا گچین کاری تے اوپن بیلٹ انا کمک اٹ کرفنگ نا بابت دائر صدارتی ریفرنس آ ڈک سلاہ ءِ بنفینے۔ دوشنبے نادے آ عدالت عظمیٰ نا کنڈآن سینیٹ نا نا گچین کاری تے اوپن بیلٹ انا کمک اٹ کرفنگ نا بابت دائر صدارتی ریفرنس آ 4 اسٹ نا تناسب اٹ ڈک سلاہ ءِ بنفنگانے۔ سپریم کورٹ نا کنڈآن پاننگانے کہ سینیٹ نا گچین کاریک آئین نا آرٹیکل 226 نا رداٹ اودیم بیلٹ انا کمک اٹ مریرہ، پارلیمںٹ آئین اٹ ترمیم کننگ کیک، الیکشن کمیشن نا زمواری ءِ کہ او سینیٹ گچین کاری تے وڈی خوری آن رکھے و شفاف جوڑ کے، شفاف گچین کاری الیکشن کمیشن نا زمواری ءِ۔ عدالتی سلاہ ٹی پاننگانے کہ وونٹ انا رازداری مدامی مننگ کپک، سپریم کورٹ 1967ء ٹی نیاز احمد کیس اٹ فیصلہ ہم تسنے کہ وونٹ مدام اودیم سلنگ کپک، بیلٹ پیپرنا اودیم مننگ حتمی اف۔ عدالتی سلاہ ٹی مستی پاننگانے کہ غٹ ادارہ غاک الیکشن کمیشن نا پابند ءُ۔ الیکشن کمیشن آرٹیکل 218 نا رداٹ دوئی واکداری تا رداٹ پوسکن آ ٹیکنالوجی نا کمک اٹ شفاف گچین کاری تا اڈتننگ ءِ پک کننگ کیک، الیکشن کمیشن شفاف گچین کاری تا اڈتننگ کن پوسکن آ ٹیکنالوجی ءِ کاریم اٹ اتے، الیکشن کمیشن نا کاریم کرپٹ پریکٹس ءِ توننگ ءِ۔ سپریم کورٹ نا کنڈآن پاننگانے کہ صدر مملکت عدالت عظمیٰ ٹی ریفرنس مون تس، چیف جسٹس آف پاکستان جسٹس گلزار احمد نا کماشی ٹی پنچ باسکی لارجر بینچ سینیٹ گچین کاری تے اوپن بیلٹ انا کمک اٹ کرفنگ نا بابت دائر صدارتی ریفرنس آ سماعت کریسس، بینچ اٹ اوار عدالت عظمیٰ نا چار شرفمند آ جج صاحب آک ریفرنس ءِ قابل ورندی گوندار وخت اس کہ جسٹس یحییٰ آفریدی گیشتری سلاہ آن اختلاف کرے۔ یات سلے کہ ہندا بڑزکو معاملہ آ وکیل آتا دلیل پورو مننگ آن پد عدالت عظمیٰ تدوک آ جمعہ نادے آ تینا سلاہ ءِ ڈک کریسس۔
