پشاور۔ 01 مارچ (اے پی پی) بنجائی وزیر حوالکاری و شینکاری شبلی فراز پارینے کہ غٹ تعلقدار ادارہ غاک سینیٹ نا گچین کاری تیٹی اسمبلی نا باسک آتا نہاد تننگ نا بابت کروک آ کوشست آتیا نظر تخنگ کن متحرک ءُ و ہرکس کہ دا گچین کاری تیٹی وڈی خوری نا سیبو ءِ ہلیک یا وڈی خوری نا کوشست آتا گواچی مریک اونا برخلاف کانود نا رداٹ کارروائی مریک۔ دوشنبے نادے آ پشاور اٹی وزیراعلیٰ خیبر پختونخوا نا خصوصی کمکار حوالکاری کامران بنگش تون اوار پریس کانفرنس آن تران کرسا سینیٹر شبلی فراز پارے کہ سینیٹ نا گچین کاری تا بابت صدارتی ریفرنس نا بابت سپریم کورٹ نا سلاہ  تاریخی اہمیت تخک ودا سلاہ آن دا لگک کہ سینیٹ نا گچین کاریک آئین نا آرٹیکل 226 نا رداٹ ہی مریرہ، ولے سپریم کورٹ الیکشن کمیشن ءِ سینیٹ نا گچین کاری تا شفافیت ءِ پک کننگ کن ٹیکنالوجی نا کاریم اٹ اتنگ و ایلو وسیلہ غاتا کاریم اٹ اتنگ نا پارت کرینے۔ اوپارے کہ سپریم کورٹ پارینے کہ ’’سیکریسی آف بیلٹ‘‘ مدامی اف، ہنداخاطرآن داسہ دا الیکشن کمیشن نا زمواری ءِ کہ او ہراوڑ دافتے پک کیک کہ بیلٹ پیپر آتا سیکریسی مدامی کن سلپ۔ اوپارے کہ پی ٹی آئی نا نظریہ ءِ کہ ملک اٹ ہربابت شفافیت و میرٹ نا بالادستی ءِ پک کننگے و کرپشن فری سوسائٹی نا جوڑ کننگ نا کنڈآن ودفنگے ولے داوخت اٹ   دونظریہ نا جنگ ءِ، اسہ نظریہ پی ٹی آئی نا ءِ ہراڑتون او راست کنڈآ سلوک نظر بریک وخت اس کہ ارٹ میکو نظریہ اپوزیشن نا ءِ ہرا ’’سٹیٹس ءِ‘‘ خواہک و ضمیر ہلنگ نا سیاست نا مون آ دننگ آ یخین تخک۔ دانظریہ تون اپوزیشن چپ کنڈآ سلوک نظربریک۔ اوپارے  کہ ہندانظریہ نا رداٹ اسلام آباد آن سینیٹ نا نشست آ اپوزیشن تینا اومیتدار اس ایسونے،واپوزیشن نا کوشست ءِ کہ نمبر گیم اٹ کم مننگ آن پد ہم میرٹ نا قتل عام کرسا دا اومیتدار ءِ ہرا وڈی خوری و قومی خزانہ ءِ نسخان تننگ اٹ اوار ئس، سرسہب کرفنگے۔ سینیٹر شبلی فراز پارے کہ اپوزیشن اومیتدار آتا مقابلہ ٹی اسلام آباد نشست کن حکومتی اومیتدار حفیظ شیخ ایماندار و قابل ءُ بندغ اسے و اوسرسہب مریک۔ اوپارے کہ لس گچین کاری تیانبار سینیٹ نا گچین کاری تیٹی ہم ووٹر شخصیت آتے آخا بلکن عمران خان نا نظریہ ءِ وونٹ ایترہ و وعمران خان نا کنڈآن میدان اٹ دڑفوک آ اومیتدار سرسہب مریک۔ اوپارے کہ نن سینیٹ نا گچین کاری تیٹی پیسہ غاتا کاریم اٹ اتنگ و وڈی خوری آ مبنی چم آتاکسر ءِ توننگ خوانہ انتئے کہ ہرافک پیسہ نا زی آ سیٹ ءِ کٹرہ اوفک الس نا فائدہ ٹی کانود جوڑ کننگ کپسہ۔ اوپارے کہ مستین اٹ پیسہ نا بنداو آ گچین کاری تیٹی سرسہبی دوئی کروک آک جند انا فائدہ غاتیکن کاریم کرسا کریر ہرانا سوب آن ملک اخلاقی و زرگزرانی وڑاٹ ہمو ہند ءِ ہلنگ کتو ہرااونا حق ئس۔