حوال: ناصر عباس
مٹ و بدل: سعادت ایم حسنی
وتواجہ و فعال عدلیہ جمہوریت، اسلوب حکمرانی ، سکیورٹی ، زرگزرانی شونداری کن اہم تصور کننگک، انتئے کہ داڑآن غٹ شاری تیکن کانود نا حکمرانی ءِ پک کننگ اٹ کمک رسینگک، دا کانود آ عمل کروک آ شاری تا حق انا رکھ انا ضمانت ءِ، داخاص ءُ فرد ، کمیونٹی، فرقہ یا مذہب نا برخلاف ہر فرد یا پڑک نا غیر کانودی گام گیج نا برخلاف ڈھال مریک۔ آجو عدلیہ نا اسہ اہم ءُ پلواس داہم ارے کہ داڑآن جوان نظم و نسق ءِ پک کننگ و شونہال و بریبری آ مبنی راج انا ٹہیفنگ اٹ کمک رسینگک۔ ہر ملک اٹ دا کلچر ءِ مون آ دننگ کن اصلاحات نا گرج مریک ہراڑآن اختہ و محروم تپہ غاتے انصاف نا ہر گرج انا فراوانی ٹی کمک رسینگک ولے بدبختی اٹ پاکستان اٹ مستین نا حکومت آتا کنڈآن عدالتی اصلاحات نا قول ءِ تو کننگا ولے کیہی دہائی آن داڑآ عمل کننگتنے۔ پاکستان تحریک انصاف نا حکومت اقتدار اٹ بننگ آن پد عدالتی نظام اٹ اصلاحات نا زمواری ءِ ہرفے و ساڑی حکومت نا گام گیج آن متکن آ عدالتی نظام اٹ اصلاحات نا اومیت مون آ بس۔
الس خاص وڑاٹ راج انا نزور تپہ غاتے انصاف نا آسانی اٹ فراوانی ءِ پک کننگ پاکستان تحریک انصاف نا منشور ءِ
، دا منشور آ عملدرآمد نا رداٹ وزیراعظم عمران خان 29 مئی 2020ء آ بنجائی وزیر کانود و انصاف بیرسٹر فروغ نسیم و وزیراعظم نا سلاہکار پارلیمانی امور ڈاکٹر بابر اعوان نا کماشی ٹی اِراکمیٹی جوڑ کرے، ہرافتا مسخت عدالتی اصلاحات و زندان تیٹی بند زالبول آتا حالیت و اوفتا درمان نا بابت سلاہ و سوج تیار کننگ ئس۔ کمیٹی ءِ عدالتی اصلاحات و دا اصلاحات آتیا عملدرآمد نا زمواری ہم تننگا۔ عدالتی اصلاحات نا بابت کمیٹی ءِ فوجداری نظام انصاف، پولیس کلچر، مقدمہ غاتا درج، انویسٹی گیشن و زندان تا نظام اٹ اصلاحات آ عملدرآمد کن لائحہ عمل اس جوڑ کننگ نا پارت کننگاسس وخت اس کہ ایلو کمیٹی ءِ عدالتی نظام اٹ اصلاحات و بندی زالبول آتا خیالداری کن سلاہ و سوج آتا تیاری نا زمواری ءِ تننگاسس۔
پاکستان تحریک انصاف نا حکومت نا تدوک آ 2 سال اٹی وضع کروک آ اصلاحات آتا بابت بنجائی وزیر کانود و انصاف بیرسٹر ڈاکٹر فروغ نسیم پارے کہ وزارت پوسکن کانود جوڑ کننگ، ریفرنسز، آرا، تین پہ تینی کانودی کمکاری نا تیاری نا مسودہ تیار کرینے ہراکہ تدوک آ 10 سال آن پدتمنگ نا گواچی ئسر وخت اس کہ مسکوہی حکومت آک تین پہ تینی کانودی کمکاری نا بابت کانود نا مسودہ اس تیار کریر تانکہ ایلو ملک آتے اوفتا درخواست آ کانودی کمک فراوان کننگے و فوجداری مقدمہ غاتیٹی اوفتا کمکاری کن المی گام گیج کننگ مرے۔
میوچل لیگل اسسٹنٹس فوجداری باندات آتیٹی تین پہ تینی کانودی کمک فراوان کننگ نا وڑوڈول اس مہیا کیک۔ اوپارے کہ وزارت کانود وراثتی کانود نا مسودہ اس ہم تیار کرے ہراکہ پارلیمنٹ آن منظور مس تانکہ لیٹرز آف ایڈمنسٹریشن اینڈ سیکسیشن سرٹیفکیٹس نا جاری کننگ کن نادرا نا کمک اٹ آسراتی ہند آتے جوڑ کننگ مرے۔ مہالو دا عمل کن کیہی تُو لگاکہ ولے داسہ دا 15 دے اٹی پورو مریک وخت اس کہ مہالو غٹ خاہوت آتے جونی وڑاٹ عدالت آتیٹی ساڑی مروئی تماکہ ولے داسہ اگہ کانودی وارث ساڑی اف ہم تو لیٹرز آف ایڈمنسٹریشن اینڈ سکسیشن سرٹیفکیٹس جاری کننگک۔
وزیر کانود پارے کہ ترمیم آن مست عدالت آک لیٹرز آف ایڈ منسٹریشن اینڈ سکسیشن سرٹیفکیٹس ایکٹ 1925نا رداٹ جاری کریرہ۔ نادرا نا کمک اٹ داسہ تیار کروک آ پوسکن آ نظام آن لیٹرز آف ایڈمنسٹریشن اینڈ سکسیشن سرٹیفکیٹس داسہ پیشن نا ملک مشن آتیان ہم دوئی کننگ مریک۔ اوپارے کہ زالبول آتا حق انا رکھ اکن کانود جوڑ کننگ نمان سرسہبی اسے۔ زالبول پراپرٹی رائٹس ایکٹ 2020ء آ عملدرآمد نا کانود اہم کانود سازی ءِ، داڑآن زالبول آتے وراثتی پراپرٹی آن محروم مننگ آن رکھ ملک، اگہ جاگہ اس ہم زالبول آتے داحق آن محروم کننگک تو محتسب ءِ داڑآ کارروائی نا اختیار تننگانے، حکومت زالبول و چناتے مالی و کانودی کمک کن لیگل ایڈجسٹس اتھارٹی ایکٹ 2020ءِ جوڑ کرینے۔ ریپ و جونی زیزاریفنگ نا ڈوہ و صنفی امتیاز آ مبنی بیدادی نا مقدمہ غاتے ترندی اٹ سرتننگ کن اینٹی ریپ (انویسٹی گیشن اینڈ ٹرائل) آرڈیننس 2020و کریمنل لاترمیمی آرڈیننس 2020نافذ کننگانے۔ زالبول و چناتا مقدمہ غاتیکن خصوصی عدالت آتا جوڑ کننگ و خصوصی ٹیم ٹہیفنگ نا ڈٹ بندی کننگ انگ ءِ۔ پاکستان تحریک انصاف نا دور حکومت اٹ اہم کانود سازی ٹی اینٹی منی لانڈرنگ ترمیمی بل 2020، ضابطہ فوجداری بل 2020، کوویڈ۔ 19 (ذخیرہ اندوزی) آرڈیننس 2020و کوویڈ۔ 19 (اسمگلنگ نا توننگ) آرڈیننس 2020کون آ اہم کانود سازی کننگانے۔
سپریم کورٹ انا سینئر وکیل ذوالفقار احمد بھٹہ پارے کہ میوچل لیگل اسسٹنٹس نا بابت کانود سازی ساڑی حکومت نا اہم ءُ کارنامہ اسے، داکان مست پاکستان اٹ کروک آ ڈوہ انا بابت پیشن نا ملک آن شاہدی یکجا کننگ نا ہچ ءُ کانود اس الوکہ، داکانود آن پد حکومت پاکستان اٹ مروک آ ڈوہ انا برخلاف ہر ملک آن شاہدی دوئی کننگ کیک، دا نمان سرسہبی ءِ۔ اووراثت اٹ زالبول آتا ملکیتی حق انا رکھ اکن زالبول ملکتی حق بل 2020ء آ عملدرآمد نا ستا ءِ کرے۔ کیہی دہائی آن زالبول آتے رواثتی ڈغار آن محروم کننگ انگ ءِ، داسہ محتسب مستین آنبار کیہی سال آتا جاگہ غا مسہ تُو اٹی داوڑنا مقدمہ غاتا فیصلہ ءِ کیک۔
اوپارے کہ لیٹرز آف ایڈ منسٹریشن اینڈ سکسیشن سرٹیفکیٹس ایکٹ 2019اہم ءُ گام اسے، وزارت کانود و نادرا نا کمک اٹ داسہ 15 دے اٹی لیٹرز آف ایڈ منسٹریشن اینڈ سکسیشن سرٹیفکیٹس جاری کننگک، دا گچین ءُ گام اسے و غٹ شاری تیکن جوان مریک۔
لااینڈ جسٹس کمیشن نا رداٹ سپریم کورٹ اٹ داوخت آ 47 ہزار 377 کیس پدتموک ءُ، پنچ ہائی کورٹ آتیٹی 3 لکھ وخت اس کہ ہرچار آ صوبہ و بنجائی دارالحکومت آتا رداٹ کانود اسکان رسینگ شاری تا بنداوی حق ءِ، اپریل 2019ء آ مسکوہی چیف جسٹس آصف سعید کھوسہ مخلوق ءِ دمدستی انصاف فراوان کننگ و مقدمہ غاتے ترندی اٹ سرتننگ کن خون و منشیات نا مقدمہ غاتا ہڑدے ئی بنداو آ سماعت کن مچ آ ملک اٹ 110 ماڈل کورٹس جوڑ کرے۔ مقدمہ غاتے ترندی اٹ سرتننگ نا سوب آن کانودی چارہ جوئی نا خڑچ آتیٹی کمتی بسنے۔ دا ماڈل کورٹ آک عدالتی تاریخ اٹ خاموش انقلاب ءُ، خون نا ہرا مقدمہ غاک کیہی سال اسکان پد تمنگ نا گواچی مسرہ داسہ اوفتے چنکو وخت اسے ٹی سرتننگ انگ ءِ۔
