وزیر خارجہ تون ملائیشیا ٹی تعینات پاکستانی ہائی کمشنر آمنہ بلوچ نا اوڑدہی

اسلام آباد۔ 26 فروری (اے پی پی) وزیر خارجہ مخدوم شاہ محمود قریشی تون ملائیشیا ٹی تعینات پاکستانی ہائی کمشنر آمنہ بلوچ جمعہ نادے آ وزارت خارجہ ٹی اوڑدہی کرے۔ پاکستانی ہائی کمشنر آمنہ بلوچ وزیر خارجہ ءِ ملائیشیا و پاکستان نا نیام اٹ ہڑتوم آ کنڈآتا تعلقداری و کثیر الجہتی بشخ آتیٹی ہڑتوم آ کنڈآتا کمکاری نا مون آ دننگ نا بابت کروک آ کوشست آتیان معلومدار کرے۔ وزیر خارجہ پارے کہ پاکستان و ملائیشیا نا نیام اٹ تاریخی و برادرانہ تعلقداری ءِ۔ پاکستان و ملائیشیا نا نیام اٹ ہڑتوم آ کنڈآتا تعلقداری، اسہ وڑ مذہبی، دودوربیدگی قدر آٹی ءُ۔ شاہ محمودقریشی پارے کہ پاکستانی تا بھلو کچ اس ملائیشیا ٹی رہینگ انگ ءُ ہرا ملائیشیا نا شونداری و شونہالی ٹی تینا کڑد ءِ ادا کننگ اٹی ءُ۔ وزیر خارجہ پاکستانی کمیونٹی نا راجی آسراتی کن پاکستانی ہائی کمیشن نا کنڈآن چست کروک آ گام گیج آتا ستاءِ کرے۔ اوپاکستانی ہائی کمشنر ءِ ملائیشیا ٹی رہینگوک آ پاکستانی ورکرآتا راجی آسراتی نا خاص خیال ءِ تخنگ و اوفتے مون تروک ویل آتا زوت ازالہ ءِ کننگ نا پارت کرے۔ وزیر خارجہ کورونا دین انا جہانی دین اٹی پاکستانی کمیونٹی نا خاص خیال ءِ تخنگ و کچ اٹنگا وسیلہ غاتیان پد ہم پبی کمک فراوان کننگ آ آمنہ بلوچ نا منت واری ءِ ہرفے۔ وزیر خارجہ پاکستان وملائیشیا نا نیام اٹ چندی بشخ آتیٹی ہڑتوم آ کنڈآتا اقتصادی کمکاری ءِ ودفنگ کن پین کوشست آتے کاریم اٹ اتنگ نا گرج آ زور شاغا۔ آمنہ بلوچ سفتی آ ہیت و است بڈی آ وزیر خارجہ نا منت واری ءِ ہرفے۔