بنجائی وزیر ڈٹ بندی اسد عمر نا چیئرمین سی پیک اتھارٹی عاصم سلیم باجوہ تون اوار فیڈمک فیصل آباد نا دورہ، چیئرمین فیڈمک نا بریفنگ، جھمرہ انٹرچینج نا منظوری ءِ ہم تننگا

فیصل آباد۔ 26 فروری (اے پی پی) بنجائی وزیر ڈٹ بندی اسد عمر چیئرمین سی پیک اتھارٹی عاصم سلیم باجوہ تون اوار فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی نا ہیڈ آفس نا دورہ ءِ کریر۔ چیئرمین فیڈمک میاں کاشف اشفاق اودے پاکستان نا اولیکو سی پیک اولیتی اکنامک زون علامہ اقبال انڈسٹریل سٹی تون اوار فیڈمک نا ایلو اکنامک زون تا بارواٹ سرجم حوال تس۔ داوخت آ بنجائی وزیر ڈٹ بندی و شونداری اسد عمر چیئرمین فیڈمک نا درخواست آ موٹروے ایم تھری و ایم فور آ جھمرہ انٹرچینج نا تفنگ نا منظوری ءِ ہم تس۔چیئرمین فیڈمک میاں کاشف اشفاق بنجائی وزیر اسد عمر و چیئرمین سی پیک اتھارٹی عاصم سلیم باجوہ ءِ حوال اٹی جھمرہ انٹرچینج نا اہمیت نا بارواٹ معلومدار کرسا پارے کہ جھمرہ انٹرچینج وخت انا اہم گرج ءِہنداخاطرآن دانا دمدستی تفنگ نا موکل تننگے ہراڑآ اسد عمر انٹرچینج نا تفنگ نا منظوری ءِ تس۔ کاشف اشفاق پارے کہ فیڈمک ءِ وافر کچ اٹ بجلی و گیس انا گرج ءِ ہرادے امنا کرسا اسد عمر پڑو کرے کہ فیڈمک ءِ اونا گرج انا رداٹ بجلی و گیس انا فراوانی ءِ پک کننگک۔ چیئرمین فیڈمک پارے کہ فیڈمک نا زیر سایہ اسپیشل اکنامک زون اٹ صنعت آتون دہ سال اسکان انکم خراج ہلنگپک ہراڑآ بنجائی وزیر اسد عمر پارے کہ صنعتکاری ءِ مون آ دننگ اٹ فیدمک نا اہم ءُ رول اسے وخت اس کہ علامہ اقبال انڈسٹریل سٹی فیصل آباد گچین لوکیشن آ واقع ءِ ہنداخاطرآن علامہ اقبال انڈسٹریل سٹی ءِ زوت پورو کننگ کن غٹ ممکن کمک فراوان کننگک۔ کاشف اشفاق پارے کہ علامہ اقبال انڈسٹریل سٹی نا اولیکو فیز پورو مننگ نا خڑک ءِ، فیڈمک اٹ صنعت آتا آسراتی کن ون ونڈو سروس سنٹر نا بناءِ کننگانے انتئے کہ نن ایم تھری انڈسٹریل سٹی و علامہ اقبال انڈسٹریل سٹی ءِ زوت آن زوت آباد کننگ خوانہ۔ داوخت آ بنجائی وزیر اسد عمر باوری کرفے کہ بنجائی حکومت فیڈمک ءِ ہروڑنا کمک فراوان کیک انتئے کہ فیڈمک نئے بیرہ وزیراعظم عمران خان نا ویژن نا رداٹ کاریم کننگ ءِ بلکن دا ڈیہہ ٹی صنعتی، کاروباری، واپاری، زرگزرانی، اقتصادی، برآمدی لحاظ اٹ گیم چینجر ہم جوڑ مریک۔ داوخت آ بنجائی وزیر ڈٹ بندی اسد عمر چیئرمین سی پیک اتھارٹی عاصم سلیم باجوہ تون اوار علامہ اقبال انڈسٹریل سٹی نا چندی بشخ آتا معائنہ ءِ ہم کرے۔