پاکستان عراق تون تینا ہڑتوم آ کنڈآتا تعلقداری تے بھاز اہمیت ایتک و اوفتے پین سوگو کننگ نا خواہندار ءِ۔ شاہ محمود قریشی

اسلام آباد۔ 26 فروری (اے پی پی) وزیر خارجہ مخدوم شاہ محمود قریشی پارینے کہ پاکستان عراق تون تیناہڑتوم آ کنڈآتا تعلقداری تے بھاز اہمیت ایتک و اوفتے پین سوگو کننگ نا خواہندار ءِ۔ داہیت ءِ او عراقی وزیر دفاع جمعہ عناد سعدون الجبوری تون گپ وتران کرسا پارے ہرا جمعہ نادے آ اوڑتون وزارت خارجہ ٹی اوڑدہی کرے۔ بنجائی وزیر دفاعی پیداوار و گودی زبیدہ جلال ئسک ہم داوخت آ ساڑی ئسر۔ اوڑدہی ٹی ہڑتوم آ کنڈآتا تعلقداری، علاقائی سلامتی تون اوار تین پہ تینی است خواہی نا باندات آ گپ وتران کننگا۔ شاہ محمود قریشی پارے کہ پاکستان و عراق نا نیام اٹ ہڑتوم آ کنڈآتا برادرانہ تعلقداری ءِ۔ پاکستان، عراق نا علاقائی سالمیت نا پبی مخ تفی ءِ کیک۔ وزیر خارجہ پاکستان و عراق نا نیام اٹ چندی بشخ آتیٹی ہڑتوم آ کنڈآتا کمکاری ءِ مون آ دننگ کن بڑزکو کہولی ڈل آتا ہن و برنا گرج آ زور شاغا وپارے کہ دہشت گردی نا برخلاف جنگ اٹ عراقی الس نا قربانی تے قدر انا نظر اٹ ہُرنہ۔ اوپارے کہ پاکستان و عراق نا نیام اٹ، شونداری، دفاعی و تین پہ تینی است خواہی نا چندی بشخ آتیٹی ہڑتوم آ کنڈآتا کمکاری ءِ ودفنگ نا گرج ءِ۔ ہڑتوم آ راہشونک ڈیہہ ٹی سیکورٹی و سوگوی کن اواری اٹ کاریم کننگ نا عزم انا درشانی ءِ کریر۔ عراق نا وزیر دفاع ڈیہہ ٹی امن و سوگوی کن پاکستان نا پدریسہ کوشست آتا ستاءِ کرے۔