لاہور۔ 26 فروری (اے پی پی) وزیراعظم عمران خان پارینے کہ میرات اٹ ملوک آ ویل آتا سوب آن کبینی ٹی ودکی مسنے، تدوک آ دہ سال ملکی تاریخ نا تہارءُ دے ئسر، سینٹرل بزنس ڈسٹرکٹ نا سوب آن کاروباری سرجزآتیٹی ودکی مریک، ڈٹ انا اولیکو ریسہ ٹی 1300 ارب روپئی نا کاروباری سرجزمریک، قطر تون ایل این جی نا پوسکن آ معاہدہ غان بروک آ دہ سال اٹی مسہ ارب ڈالر نا بچت مریک۔ داخیال آتا درشانی ءِ او جمعہ نادے آ داڑے سینٹرل بزنس ڈسٹرکٹ نا بنداو ءِ تخنگ نا دود آن تران کرسا کرے۔ وزیراعظم پارے کہ سینٹرل بزنس ڈسٹرکٹ ڈٹ انا بنداو آ خوش اُٹ، سینٹرل بزنس ڈسٹرکٹ نا سوب آن کاروباری سرجزآتیٹی ودکی مریک، ڈٹ انا اولیکو ریسہ ٹی 1300 ارب روپئی نا کاروباری سرجزمریک۔ اوپارے کہ سینٹرل بزنس ڈسٹرکٹ ملک انا کٹیا ٹی ودکی نا سوب مریک، اولیکو ریسہ ٹی 1300 ارب روپئی نا ودکی مریک۔ وزیراعظم پارے کہ مستین اٹ ملک اٹ درخت خلنگ نا ہچ ءُ سوچ اس الوکہ، دا ڈٹ آتیٹی بروک آ درخت آتے ایلوجاگہ غاتیا گدریفینہ۔ اوپارے کہ تدوک آ دہ سال ننا ملک اکن تہارءُ دے ئسر، ملک آ وام تیٹی بے تحاشا ودکی مس، زرمبادلہ نا کوڑیک کم مسر و واپاری نسخان اٹ ہم ودکی مس و روپئی نا قدر کم مس۔ اوپارے کہ ہراتم اسکان کٹیا ودپک نن تینا خڑچ آتے ہم پورو کننگ کپنہ، نن داوڑ وام تا زر ءِ تننگ کپنہ انتئے کہ ہر سال وام تیٹی ودکی مرسا ہِننگ ءِ۔ اوپارے کہ پیشن نا ملک آتیٹی رہینگوک آ پاکستانیک ننا بھاز بھلو میرات ءُ، راوی سٹی و والٹن ڈٹ اٹ پیشن نا ملک آتیٹی رہینگوک آ پاکستانیک بایدے بشخ ہلیر۔ملک انا کرنٹ اکاؤنٹ داوخت آ سرپلس ءِ، ملک اٹ پوسکن ءُ صنعت لگنگ اٹی ءِ، کاروباری سرجزآتا ودنگ آن روپئی آ زور اٹ کمتی بریک۔ اوپارے کہ ملک اٹ اولیکو وار تنخواہ دار و مزور تپہ ءِ چھت تننگ کن نیا پاکستان ہاؤسنگ اسکیم نا بناءِ کننگا۔ بینک ہم دا ڈٹ اکن وام تننگ ءُ۔ اوپارے کہ اخوت تنظیم ءِ ہم پنچ ارب روپئی تسونن تانکہ او حقدار بندغ آتے اُراتا تفنگ اٹ کمک کے، اولیکو وار ملک اٹ تینا اُرانا تغ الس کن پورو مریک۔
