پاکستان تحریک انصاف جمہوری ءُ پارٹی اسے، ہراڑے اختلاف رائے ءِ خف توننگک، پیپلزپارٹی و مسلم لیگ (ن) اٹ دا روایت اف، وزیر خارجہ مخدوم شاہ محمود قریشی

اسلام آباد۔ 25 فروری (اے پی پی) وزیر خارجہ مخدوم شاہ محمود قریشی پارینے کہ پاکستان تحریک انصاف اسہ جمہوری ءُ پارٹی اسے، ہراڑے اختلاف رائے ءِ خف توننگک، پیپلزپارٹی و مسلم لیگ (ن) اٹ دا روایت اف۔ وزیراعظم عمران خان نادورہ سری لنکا نا مسخت ہڑتوم آ کنڈآتا تعلقداری ءِ پین سوگو کننگ و اودے زرگزرانی شریداری ٹی بدل کننگ ئس۔ پنچ شنبے نادے آ وزیراعظم عمران خان نا دورہ سری لنکا و ملکی سیاسی حالیت آتا بابت اہم بیان اٹی وزیر خارجہ پارے کہ پاکستان تحریک انصاف اسہ جمہوری ءُ پارٹی اسے ہراڑے اختلاف رائے ءِ خف توننگک ولے ہراتم پارٹی نا سرکڑدہ فیصلہ اس کیک تو ولدا اودے من و عن امنا کننگک، پیپلزپارٹی و مسلم لیگ (ن) اٹ دا روایت اف۔ اوپارے کہ این اے 75 ڈسکہ نا کیس الیکشن کمیشن اٹ زیر سماعت ءِ۔ 2013ء ٹی ننا خواست آ متنازعہ پولنگ اسٹیشن تیا دُوارہ پولنگ کرفنگا، الیکشن کمیشن دا فیصلہ ءِ کڑدہ غاتا ہیت ءِ بنسا ضابطہ و کانود نا رداٹ کرے، اگہ پنجاب انتظامیہ اوفتا برخلاف دھاندلی ٹی اوار ئس تو ولدا ہندا دھاندلی وزیر آباد و خیبرپختونخوانا گچین کاری تیٹی ہم بایدے مروسس۔ وزیر خارجہ پارے کہ فیصلہ غاک اوفتا است خواہی تیا آخا کانود و ضابطہ نا رداٹ مریرہ۔ شاہ محمود قریشی پارے کہ وزیر اعظم عمران خان نا دورہ سری لنکا نا مسخت دا متکن آ ہڑتوم آ کنڈآتا تعلقداری تے پین سوگو کننگ و اودے زرگزرانی شریداری ٹی بدل کننگ ئس۔ ننا سری لنکا تون ہڑتوم آ کنڈآتا واپار 432 ملین ڈالر ءِ نن دانا کچ ءِ اسہ ارب ڈالر اسکان دننگ خوانہ۔ نن سری لنکا تون ہڑتوم آ کنڈآتا واپاری تعلقداری تا مون آ دننگ کن چندی پلو و ایف ٹی اے ءِ پین فعال کننگ نا بابت ہم گپ وتران کرین۔ وزیر خارجہ پارے کہ نن دہشت گردی تون مون تننگ کن معلومداری تا ہڷ و تس اتون اوار اسیجائی کوشست آتے کاریم اٹ اتنگ نا فیصلہ کرین۔